قازاقستاننىڭ بۇرىنعى پرەزيدەنتى نۇرسۇلتان نازارباەۆ جاڭا كونستيتۋتسيا بويىنشا رەفەرەندۋمدا داۋىس بەردى، دەپ حابارلايدى "ادىرنا".
ەكس-پرەزيدەنت نۇرسۇلتان نازارباەۆ 228-قۇرىلىمدىق سايلاۋ ۋچاسكەسىنە بارىپ، جاڭا كونستيتۋتسيانى قابىلداۋ ماسەلەسى بويىنشا ءوز تاڭداۋىن جاسادى. ول داۋىسىن ەلوردالىق استانا وپەرا تەاترى اۋماعىنداعى سايلاۋ ۋچاسكەسىندە بەردى. داۋىس بەرۋ كەزىندە ەكس-پرەزيدەنت جۋرناليستەر الدىنا شىقپاعانىمەن رەسمي سايتىندا رەفەرەندۋم مەن ەلدەگى رەفورمالار تۋرالى پىكىرى جاريالاندى.
مالىمەتكە قاراعاندا وسىدان جەتى جىل بۇرىن جوعارى بيلىكتەن ءوز ەركىمەن كەتكەنىن ايتقان نازارباەۆ بۇل شەشىمدى ەلدىڭ تۇراقتى دامۋى مەن بيلىك ساباقتاستىعى جالعاسۋى ءۇشىن قابىلداندى دەگەن.
— ۋاقىت توقتامايدى. بۋىن الماسادى. ءار بۋىن قازاقستاننىڭ تاۋەلسىزدىگىن نىعايتۋعا ءوز ۇلەسىن قوسۋى ءتيىس. ءبىزدىڭ زامان وكىلدەرى تاۋەلسىزدىكتى جاريالاپ، شەكارانى بەلگىلەپ، ەلوردانى تۇرعىزۋ ارقىلى ءوز مىندەتىن ورىندادى دەپ ەسەپتەيمىن. قازىر قازاقستاندى ودان ءارى نىعايتىپ، ونىڭ بەدەلىن كوتەرۋ قاجەت. بۇل باعىتتا از جۇمىس ىستەلىپ جاتقان جوق، سونىڭ ىشىندە مەن قولداپ وتىرعان بۇگىنگى رەفەرەندۋمنىڭ دا ماڭىزى زور. ءوز ۋاقىتىندا مەن قاسىم-جومارت توقاەۆقا تاڭداۋ جاسادىم جانە بۇل تاڭداۋىم ەشقاشان وزگەرمەيدى. وسى كونستيتۋتسيا قازاقستانىمىزدىڭ يگىلىگىنە، حالقىمىزدىڭ بەرەكەسىنە قىزمەت ەتسىن دەپ تىلەيمىن، — دەپ تۇيىندەدى نۇرسۇلتان نازارباەۆ.
7 جىل بۇرىن نازارباەۆ پرەزيدەنتتىكتەن كەتكەنىمەن، 2022 جىلعى قاڭتار وقيعاسىنا دەيىن قاۋىپسىزدىك كەڭەسىنىڭ ومىرلىك توراعاسى رەتىندە بيلىكتىڭ بارلىق تارماعىنا ىقپال ەتىپ وتىردى. ول پرەزيدەنت رەتىندە 30 جىلداي مىزعىماي بيلىكتە وتىرىپ، مەرزىمىنەن بۇرىن سايلاۋلار مەن رەفەرەندۋمدار ارقىلى ءوزىنىڭ وكىلەتىن ۇزارتۋىمەن قوعام ەسىندە قالدى.
