ۋكراينا پرەزيدەنتى ۆلاديمير زەلەنسكي اقش ۇسىنعان سوعىس توقتاتۋ جونىندەگى بەيبىت جوسپارعا قاتىستى حالىققا 10 مينۋتتىق ۇندەۋ جاسادى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ۆيدەوۇندەۋى ونىڭ بارلىق الەۋمەتتىك جەلىدەگى پاراقشالارىندا جاريالاندى.
زەلەنسكي ۋكراينا قازىرگى ۋاقىتتا تاريحتاعى ەڭ كۇردەلى كەزەڭدەردىڭ ءبىرىن باستان وتكەرىپ جاتقانىن ايتتى. ونىڭ سوزىنشە، الداعى اپتا ەل ءۇشىن «وتە قيىن» بولماق.
"قازىر ۋكراينا وتە اۋىر تاڭداۋدىڭ الدىندا قالۋى مۇمكىن: نە ابىرويدان ايىرىلۋ قاۋپى، نە باستى ارىپتەستەن ايىرىلۋ، نە ۇسىنىلعان 28 تارماقتىڭ قيىن مىندەتتەرى، نە ەڭ اۋىر قىس. ءبىز داڭعويلىققا بارمايمىز، امەريكا جانە بارلىق سەرىكتەستەرىمىزبەن سابىرلى ءارى جۇيەلى تۇردە جۇمىس ىستەي بەرەمىز", – دەدى ول.
پرەزيدەنت ەلدىڭ نەگىزگى قۇندىلىقتارى قانداي جاعدايدا دا ساقتالۋى ءتيىس ەكەنىن اتاپ ءوتتى.
«مەن جوسپارداعى بارلىق تارماق تالقىلانعان كەزدە كەم دەگەندە ەكى نارسەنىڭ نازاردان تىس قالماۋى ءۇشىن كۇرەسەمىن. ولار – ۋكراين حالقىنىڭ نامىسى مەن ەركىندىگى. سەبەبى قالعانىنىڭ ءبارى وسىعان نەگىزدەلەدى: ءبىزدىڭ تاۋەلسىزدىگىمىز، ەگەمەندىگىمىز، جەرىمىز، حالقىمىز جانە بولاشاعىمىز»، – دەدى زەلەنسكي.
ول سونداي-اق ىشكى ساياسي كۇشتەردى تارتىستى توقتاتىپ، ەل مۇددەسىن ءبىرىنشى ورىنعا قويۋعا شاقىردى.
«بارلىق ساياساتكەرلەردى سابىرعا كەلۋگە، قاجەتسىز ايعاي-شۋدان باس تارتۋعا شاقىرامىن. ۋكراينادا كىمنىڭ جاۋ ەكەنىن ۇمىتپاۋ كەرەك. مەملەكەت سوعىس جاعدايىندا بىرلەسىپ جۇمىس ىستەۋى ءتيىس: پارلامەنت تە، ۇكىمەت تە ءتيىمدى شەشىم قابىلداۋى قاجەت»، – دەدى پرەزيدەنت.
زەلەنسكي ۋكراينا ۇلتتىق مۇددەسىن ساتپايتىنىن، سەرىكتەستەرىمەن بىرلەسىپ كونسترۋكتيۆتى ۇسىنىستار ىزدەيتىنىن ايتتى.
پرەزيدەنتتىڭ ايتۋىنشا، الداعى كۇندەرى ماڭىزدى شەشىمدەر مەن وقيعالار كوپ بولماق.
