اتىراۋ وبلىسىنىڭ ماحامبەت اۋدانىندا كەمىرگىشتەر جاپپاي كوبەيىپ، تۇرعىندارعا قولايسىزدىق تۋدىرۋدا، دەپ حابارلايدى "ادىرنا" ۇلتتىق پورتالى كتك-عا سىلتەپ.
ماسەلەگە بايلانىستى بەيبارىس پەن تالدىكول اۋىلىندا ەكى مەكتەپ پەن ەكى بالاباقشا جابىلدى.
اۋداندىق ءبىلىم ءبولىمى وڭدەۋ جۇمىستارى 19 قاراشادان بەرى جۇرگىزىلىپ جاتقانىن مالىمدەدى.
«عيماراتتاردىڭ ءىشى-سىرتى تولىقتاي وڭدەلۋدە — پروفيلاكتيكالىق شارالار دا، بار كەمىرگىشتەردى جويۋ جۇمىستارى دا قاتار اتقارىلىپ جاتىر. دەراتيزاتسيا جۇرگىزۋ ءۇشىن جەكە كومپانيا تارتىلدى. جوسپار بويىنشا شارالار ءبىر اپتاعا سوزىلادى»، — دەدى ماحامبەت اۋدانى ءبىلىم بەرۋ ءبولىمىنىڭ باسشىسى ۆەنەرا قابىشەۆا.
تۇرعىنداردىڭ ايتۋىنشا، ۇيلەر مەن قورا-قوپسىعا قاپتاعان تىشقانداردان جاعىمسىز ءيىس شىعىپ، تىنىس الۋ قيىنداعان. ولار مۇنداي كولەمدەگى كەمىرگىشتەردى بۇرىن-سوڭدى كورمەگەنىن ايتادى.
ء«بىر سۇمدىق بولدى! ون كۇننەن بەرى توقتار ەمەس. ءۇي تىشقانعا تولىپ كەتتى. مىسىقتىڭ ءوزى ۇلگەرە الماي جاتىر. قاقپان قويامىز، ۋ شاشامىز، دەزينفەكتسيا جاسايمىز – ءبارى پايداسىز. ەرتەڭ بۇل ءبىر ىندەتكە اكەلسە، وعان كىم جاۋاپ بەرەدى؟» — دەپ اشىندى اۋىل تۇرعىندارىنىڭ ءبىرى.
تۇرعىندار كۇن سايىن ونداعان كەمىرگىشتى جيناپ، ورتەپ جاتقانىمەن، ولاردىڭ سانى ازايماي تۇر. اۋىل اكىمى ولاردىڭ جاپپاي كوبەيۋىنە بىلتىرعى سۋ تاسقىنى سەبەپ بولۋى مۇمكىن ەكەنىن ايتتى. قازىر جەرگىلىكتى حالىققا زيانكەستەرگە قارسى ارنايى قۇرالدار تاراتىلىپ جاتىر.
ماماندار كەمىرگىشتەردەن ينفەكتسيانىڭ بار-جوعىن تەكسەرىپ، جۇقتىرعاندارى انىقتالماعانىن حابارلادى.
