تەمىرتاۋدا جەدەل جاردەم قىزمەتكەرلەرى شامادان تىس جۇمىس جۇكتەمەسى مەن تومەن ەڭبەكاقى ماسەلەسىن كوتەردى، دەپ حابارلايدى «ادىرنا» ءتىلشىسى.
فەلدشەرلەردىڭ ايتۋىنشا، باستى ماسەلەلەردىڭ ءبىرى – ماشينا مەن بريگادالاردىڭ جەتىسپەۋشىلىگى.
«نورماتيۆ بويىنشا ءار 10 مىڭ ادامعا ءبىر جەدەل جاردەم كولىگى بولۋى ءتيىس. الايدا ءىس جۇزىندە تاۋلىگىنە 20 بريگادانىڭ ورنىنا نەبارى 10-11 بريگادا عانا جۇمىس ىستەيدى. ستانساداعى كادر تاپشىلىعى 20 فەلدشەرگە جەتىپ وتىر»،- دەيدى ولار.
ماماندار سونىڭ سالدارىنان شاقىرتۋلارعا كەشىگىپ باراتىنىن، ال كەزەككە شىققان بريگادالارعا اۋىر سالماق تۇسەتىنىن مالىمدەدى. مىسالى جاقىندا ءبىر بريگادا ءبىر تاۋلىكتە 24 شاقىرتۋ ورىنداعان.
كەيبىر قىزمەتكەرلەر جالاقىنىڭ تىم تومەن بولۋىنا بايلانىستى ەكى جەردە جۇمىس ىستەيتىنىن جاسىرمايدى. فلدشەرلەر جالاقىنىڭ 133 مىڭ تەڭگەدەن باستالاتىنىن، ال سيرەك جاعدايلاردا عانا 180 مىڭعا جەتەتىنىن اتاپ ءوتتى.
ء«بىز — العاشقى مەديتسينالىق كومەك بۋىنىمىز، ادامداردىڭ ءومىرىن قۇتقارامىز. ەندى ءوزىمىز سىزدەردەن كومەك سۇرايمىز. ءبىزدى قۇتقارىڭىزدار!»- دەدى ولار ۇندەۋدە.
وبلىستىق دەنساۋلىق ساقتاۋ باسقارماسى جاعدايدان حاباردار ەكەنىن راستادى. ولاردىڭ مالىمەتىنشە، مەديتسينا قىزمەتكەرلەرىنىڭ كاسىپوداعى جان باسىنا شاققان ءتاريفتى ۇلعايتۋ تۋرالى ۇسىنىسى بار حاتتى دەنساۋلىق ساقتاۋ مينيسترلىگىنە جولداعان.
«قازىرگى ۋاقىتتا مەديتسينا قىزمەتكەرلەرىنىڭ كاسىپوداعى ەڭبەك ۇجىمى مەن الەۋمەتتىك ارىپتەستىك اياسىندا كەلىسىم جۇرگىزە وتىرىپ، دەنساۋلىق ساقتاۋ مينيسترلىگىنە جان باسىنا شاققان ءتاريفتى ينفلياتسيا دەڭگەيىن ەسكەرە وتىرىپ، جالاقىنى ارتتىرۋعا مۇمكىندىك بەرەتىن مولشەرگە دەيىن كوتەرۋ تۋرالى ءوتىنىش-حات دايىنداپ جىبەردى»، – دەلىنگەن باسقارمانىڭ رەسمي جاۋابىندا.
سونىمەن قاتار باسقارما بيىل وبلىستىق بيۋدجەت ەسەبىنەن 113 جەدەل جاردەم كولىگى مەن ساناۆياتسيانىڭ ەكى بىرلىگى ساتىپ الىناتىنىن حابارلادى.
ەسكە سالايىق، بۇعان دەيىن استانادا كوپقاباتتى ءۇيدىڭ قاپتاماسى قۇلاعان كەزدە جەدەل جاردەم قىزمەتىن كورسەتكەن، سول كەزدە اۋىر جاراقات العان فەلدشەر ۇلدانا مىرزۋاننىڭ اۋرۋحانادا قايتىس بولعانىن جازعان ەدىك.
