Temırtauda jedel järdem qyzmetkerlerı şamadan tys jūmys jüktemesı men tömen eŋbekaqy mäselesın köterdı, dep habarlaidy «Adyrna» tılşısı.
Feldşerlerdıŋ aituynşa, basty mäselelerdıŋ bırı – maşina men brigadalardyŋ jetıspeuşılıgı.
«Normativ boiynşa är 10 myŋ adamǧa bır jedel järdem kölıgı boluy tiıs. Alaida ıs jüzınde täulıgıne 20 brigadanyŋ ornyna nebärı 10-11 brigada ǧana jūmys ısteidı. Stansadaǧy kadr tapşylyǧy 20 feldşerge jetıp otyr»,- deidı olar.
Mamandar sonyŋ saldarynan şaqyrtularǧa keşıgıp baratynyn, al kezekke şyqqan brigadalarǧa auyr salmaq tüsetının mälımdedı. Mysaly jaqynda bır brigada bır täulıkte 24 şaqyrtu oryndaǧan.
Keibır qyzmetkerler jalaqynyŋ tym tömen boluyna bailanysty ekı jerde jūmys ısteitının jasyrmaidy. Fldşerler jalaqynyŋ 133 myŋ teŋgeden bastalatynyn, al sirek jaǧdailarda ǧana 180 myŋǧa jetetının atap öttı.
«Bız — alǧaşqy medisinalyq kömek buynymyz, adamdardyŋ ömırın qūtqaramyz. Endı özımız sızderden kömek sūraimyz. Bızdı qūtqaryŋyzdar!»- dedı olar ündeude.
Oblystyq densaulyq saqtau basqarmasy jaǧdaidan habardar ekenın rastady. Olardyŋ mälımetınşe, medisina qyzmetkerlerınıŋ käsıpodaǧy jan basyna şaqqan tariftı ūlǧaitu turaly ūsynysy bar hatty Densaulyq saqtau ministrlıgıne joldaǧan.
«Qazırgı uaqytta medisina qyzmetkerlerınıŋ käsıpodaǧy eŋbek ūjymy men äleumettık ärıptestık aiasynda kelısım jürgıze otyryp, Densaulyq saqtau ministrlıgıne jan basyna şaqqan tariftı infliasiia deŋgeiın eskere otyryp, jalaqyny arttyruǧa mümkındık beretın mölşerge deiın köteru turaly ötınış-hat daiyndap jıberdı», – delıngen basqarmanyŋ resmi jauabynda.
Sonymen qatar basqarma biyl oblystyq biudjet esebınen 113 jedel järdem kölıgı men sanaviasiianyŋ ekı bırlıgı satyp alynatynyn habarlady.
Eske salaiyq, būǧan deiın Astanada köpqabatty üidıŋ qaptamasy qūlaǧan kezde jedel järdem qyzmetın körsetken, sol kezde auyr jaraqat alǧan feldşer Ūldana Myrzuannyŋ auruhanada qaitys bolǧanyn jazǧan edık.
