استانادا تۇرعىن ءۇيدىڭ قاسبەتى قۇلاعان كەزدە تۇرعىندارعا كومەك كورسەتۋگە ۇمتىلىپ، ءوزى اۋىر جاراقات العان 23 جاستاعى فەلدشەر ۇلدانا مىرزۋان قايتىس بولدى، دەپ حابارلايدى "ادىرنا" ۇلتتىق پورتالى.
قوعامدىق دەنساۋلىق ساقتاۋ باسقارماسىنىڭ مالىمەتىنشە، 8 قاراشادا عيماراتتان قۇلاعان كونديتسيونەر ۇلدانانى اۋىر جاراقاتتاعان. دارىگەرلەر ونىڭ ءومىرىن امان الىپ قالۋ ءۇشىن قولدارىنان كەلگەننىڭ ءبارىن جاساسا دا، ول 18 قاراشا كۇنى كوز جۇمدى.
ۇلدانا بەس جىل بويى فەلدشەر بولىپ جۇمىس ىستەگەن. تۋىستارى ونىڭ قاۋىپتى ماماندىقتان كەتۋىن قالاعانىمەن، ول ءوز كاسىبىن ەرەكشە جاقسى كورىپ، وزگەگە كومەك كورسەتۋدى — ادامدىق پارىزىم دەپ بىلگەن. سونىمەن قاتار، ول نەبارى بىرنەشە اپتا بۇرىن عانا تۇرمىسقا شىققان.
مارقۇمنىڭ كۇيەۋى ونىڭ ەرلىگى مەن ادامگەرشىلىگىن ايتىپ، كىنالىلەردىڭ جاۋاپقا تارتىلۋىن تالاپ ەتتى.
«ەگەر ول مەنى قازىر ەستىپ تۇرسا، مەن وعان قاتتى ساعىنعانىمدى جانە قاتتى جاقسى كورەتىنىمدى ايتقىم كەلەدى»، — دەدى ول.
بۇعان دەيىن استانادا تۇرعىن ءۇيدىڭ سىرتقى قابىرعاسى قۇلاپ، بىرنەشە ادام زارداپ شەككەنى، ال جەدەل جاردەم فەلدشەرى ۇلدانانىڭ اۋىر جارالانعانى حابارلانعان بولاتىن.
وقيعاعا بايلانىستى تەرگەۋ جالعاسىپ جاتىر.
