تۇركيا گازا سەكتورىندا جاسالعان گەنوتسيد پەن ادامزاتقا قارسى قىلمىستار ءۇشىن شەنەۋنىكتەردى قاماۋعا وردەر بەردى، دەپ حابارلايدى "ادىرنا" ۇلتتىق پورتالى.
DW مالىمەتىنشە، ىستامبۇلدىڭ باس پروكۋراتۋراسى 36 جوعارى لاۋازىمدى يزرايلدىك شەنەۋنىكتى قاماۋعا الۋعا وردەر بەردى.
ايىپ تاعىلعانداردىڭ قاتارىندا يزرايل پرەمەر-ءمينيسترى بينيامين نەتانياحۋ، قورعانىس ءمينيسترى يسراەل كاتسقا، ۇلتتىق قاۋىپسىزدىك ءمينيسترى ءارى «ەۆرەي كۇشى» («وتسما يەحۋديت») پارتياسىنىڭ جەتەكشىسى يتامار بەن-گۆيرگە، يزرايل قورعانىس ارمياسىنىڭ (تساحال) باس شتابىنىڭ باستىعى گەنەرال-لەيتەنانت ەيال زامير بار.
پروكۋراتۋرا مالىمدەمەسىندە:
“يزرايل وسى كۇنگە دەيىن گازا سەكتورىندا جۇيەلى تۇردە گەنوتسيد پەن ادامزاتقا قارسى قىلمىستار جاسادى. ونىڭ سالدارىنان مىڭداعان ادام، سونىڭ ىشىندە ايەلدەر مەن بالالار قازا تاپتى، تاعى مىڭداعانى جارالاندى. ەلدى مەكەندەر جەرمەن-جەكسەن بولدى”، – دەلىنگەن قۇجاتتا.
يزرايل باسشىلارى قازىرگى ۋاقىتتا تۇركيا اۋماعىندا بولماعاندىقتان، ىستامبۇل قىلمىستىق سوتى سىرتتاي قاماۋعا الۋ وردەرىن شىعاردى.
