قازاقستان رەسپۋبليكاسىنىڭ جاساندى ينتەللەكت جانە تسيفرلىق دامۋ مينيسترلىگى مەن Oracle كومپانياسى جاساندى ينتەللەكت، جوعارى ءونىمدى ەسەپتەۋلەر جانە «بۇلتتى» تەحنولوگيالار سالالارىنداعى ىنتىماقتاستىقتى دامىتۋعا باعىتتالعان ءوزارا تۇسىنىستىك تۋرالى مەموراندۋمعا قول قويدى.
قول قويۋ ءراسىمى ۆاشينگتوندا اقش - ورتالىق ازيا ەلدەرى اراسىنداعى وڭىرلىك ىنتىماقتاستىقتى كەڭەيتۋ، ەكونوميكالىق جانە تەحنولوگيالىق دامۋدى قولداۋعا باعىتتالعان C5+1 فورماتىنداعى بيزنەس-كونفەرەنتسيا بارىسىندا ءوتتى.
مەموراندۋم اياسىندا تاراپتار قازاقستاندا Oracle كومپانياسىنىڭ پيلوتتىق جي-ينفراقۇرىلىمىن ورنالاستىرۋ مۇمكىندىگىن باعالاۋعا جانە ءتيىستى تەستىلەۋلەر جۇرگىزۋگە قولداۋ كورسەتۋ، بۇلتتى دەرەكتەر ورتالىقتارىن كەزەڭ-كەزەڭىمەن دامىتۋ الەۋەتىن زەرتتەۋ، سونداي-اق قولدانبالى جاساندى ينتەللەكت بويىنشا پيلوتتىق جوبالاردى جۇزەگە اسىرۋ باعىتىندا ىنتىماقتاستىق ورناتۋدى جوسپارلاپ وتىر.
سونداي-اق ىنتىماقتاستىق اياسىندا كادرلىق الەۋەتتى دامىتۋعا باعىتتالعان ارنايى وقۋ جانە سەرتيفيكاتتاۋ باعدارلامالارى، بىرلەسكەن عىلىمي-زەرتتەۋ جوبالارى، قازاقستاندا Oracle قۇزىرەتتەر ورتالىعىن قۇرۋ ماسەلەلەرى قاراستىرىلۋى مۇمكىن. تاراپتار جاساندى ينتەللەكتىنى دامىتۋداعى رەتتەۋ جانە ەتيكالىق ماسەلەلەر بويىنشا ديالوگتى جالعاستىرۋعا نيەتتى.
جاسلان ماديەۆ، قازاقستان رەسپۋبليكاسى پرەمەر-ءمينيسترىنىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى:«Oracle كومپانياسىمەن ىنتىماقتاستىق قازاقستاننىڭ ۇلتتىق جاساندى ينتەللەكت ينفراقۇرىلىمىن جانە تسيفرلىق ەكوجۇيەسىن دامىتۋعا ىقپال ەتەدى. بۇل ەلىمىزدىڭ تسيفرلىق ەكونوميكاسىن قالىپتاستىرۋ ءۇشىن بەرىك نەگىز قۇرۋ جانە تەحنولوگيالىق يننوۆاتسيالاردى ىلگەرىلەتۋ جونىندەگى ءبىزدىڭ ۇستانىمىمىزدى كورسەتەدى».
ەلليسون و’برايەن، Oracle كومپانياسىنىڭ مەملەكەتتىك ورگاندارمەن جۇمىس جونىندەگى باسقارۋشى ديرەكتورى: «Oracle قازاقستاننىڭ جاساندى ينتەللەكتىگە قاتىستى ۇلتتىق ستراتەگياسىن ىسكە اسىرۋدى قولداۋعا دايىن. ءبىزدىڭ تەحنولوگيالار مەن ساراپتامالىق تاجىريبەمىز تسيفرلىق ترانسفورماتسيانى جەدەلدەتۋگە جانە ءارتۇرلى سالالاردا يننوۆاتسيالاردى ىنتالاندىرۋعا كومەكتەسەدى».
