جاڭا جىلدان باستاپ وزبەكستان اقش-تىڭ بارلىق ازاماتتارىنا 30 كۇنگە ۆيزاسىز كىرۋ ءتارتىبىن ەنگىزەدى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل تۋرالى ەل پرەزيدەنتى شاۆكات ميرزيوەۆتىڭ ءتيىستى جارلىعىندا كورسەتىلگەن.
اگەنتتىكتىڭ مالىمەتىنشە، قۇجاتقا مەملەكەت باسشىسى 3 قاراشا كۇنى قول قويعان. جاڭا ەرەجەنىڭ ماقساتى – وزبەكستان مەن اقش اراسىنداعى ساۋدا-ەكونوميكالىق جانە مادەني-گۋمانيتارلىق بايلانىستاردى دامىتۋ، سونداي-اق تۋريزم سالاسىن وركەندەتۋ بولىپ تابىلادى.
قازىرگى ۋاقىتتا امەريكالىق ازاماتتارعا وزبەكستانعا ۆيزاسىز كىرۋگە تەك 55 جاستان اسقان جانە تۋريزم ماقساتىندا كەلگەن جاعدايدا عانا رۇقسات ەتىلەدى.
بۇل تالاپ 2021 جىلدان بەرى كۇشىندە.
ەندى 2026 جىلدان باستاپ جاڭا ءتارتىپ اقش-تىڭ بارلىق ازاماتتارىنا جاسىنا جانە ساپار ماقساتىنا قاراماستان قولدانىلادى.
ايتا كەتەيىك، ۆيزاسىز رەجيم ەنگىزۋ تۋرالى باستاما پرەزيدەنت ميرزيوەۆتىڭ بيىل مامىر ايىندا تۋريستىك اعىمدى ارتتىرۋ جونىندەگى جارلىعىندا دا قاراستىرىلعان ەدى.
