فرانتسيا پروكۋراتۋراسى لۋۆر مۇراجايىنداعى اسا ءىرى كولەمدەگى ۇرلىق ءىسى بويىنشا ۇستالعان بەس ادامنىڭ ەكەۋىنە رەسمي ايىپ تاقتى. ولار 102 ميلليون دوللار تۇراتىن زەرگەرلىك بۇيىمداردى ۇرلاۋعا قاتىسى بار دەگەن كۇدىككە ءىلىندى. بۇل تۋرالى Reuters جازدى، دەپ حابارلايدى "ادىرنا".
پاريج سوتىنىڭ مالىمەتىنشە، كۇدىكتىلەردىڭ ءبىرى — ەر ادام، ەكىنشىسى — ايەل. قالعان ۇشەۋى قاجەتتى تەرگەۋ شارالارى جۇرگىزىلگەن سوڭ بوساتىلعان.
تەرگەۋ ماتەريالدارىنا سايكەس، 37 جاستاعى ەر ادام بۇرىن دا بىرنەشە رەت ۇرلىق ءۇشىن جاۋاپقا تارتىلعان. قازىر ول قىلمىستى ۇيىمداستىرعان جانە قىلمىستىق توپتىڭ مۇشەسى رەتىندە ايىپتالىپ وتىر. ال 38 جاستاعى ايەل وسى ىستەگى سەرىكتەسى ءارى سىبايلاسى رەتىندە تەرگەلۋدە.
بۇل ايىپتار 25 قازاندا ۇستالىپ، 29 قازاندا رەسمي تۇردە ىسكە تارتىلعان تاعى ەكى كۇدىكتىگە قاتىستى تەرگەۋدىڭ جالعاسى بولدى. ولاردىڭ ءبىرى – 34 جاستاعى الجير ازاماتى، ونىڭ دنق ءىزى قاشۋ كەزىندە پايدالانىلعان سكۋتەردەن تابىلعان. ەكىنشىسى – 39 جاستاعى تاكسيست، پاريج ماڭىنىڭ تۇرعىنى.
وسىلايشا، لۋۆرداعى ۇرلىق ءىسى بويىنشا ايىپ تاعىلعانداردىڭ جالپى سانى ءتورت ادامعا جەتتى. تەرگەۋ مالىمەتىنشە، بۇل قىلمىستىڭ ارتىندا بىرنەشە ەلدە ارەكەت ەتەتىن جاقسى ۇيىمداسقان قىلمىستىق توپ تۇرۋى مۇمكىن.
