تاجىكستاننىڭ تاجىكاباد اۋدانىنداعى دەحدال مۇزدىعىنان ءىرى مۇز ماسساسى ءبولىنىپ قالدى، دەپ حابارلايدى "ادىرنا" ۇلتتىق پورتالى Kazinform-عا سىلتەپ.
وقيعا 2025 جىلدىڭ 25 قازانىندا تىركەلگەن.
ەلدىڭ گيدرومەتەورولوگيا اگەنتتىگى مۇزدىقتىڭ ۇزىندىعى شامامەن 1500 مەترگە، بيىكتىگى 50 مەترگە دەيىن جەتكەن بولىگى تومەن قاراي جىلجىعانىن حابارلادى.
ماماندار بۇل تابيعي قۇبىلىستى اۋا تەمپەراتۋراسىنىڭ كوتەرىلۋىمەن جانە ۇزاق ۋاقىت جاۋىن-شاشىننىڭ بولماۋىمەن بايلانىستىرىپ وتىر. بۇل جاعداي مۇزدىقتىڭ بەلسەندى ەرۋىنە جانە ايماقتاعى سۋ تەڭگەرىمىنىڭ وزگەرۋىنە اسەر ەتكەن.
بيلىك وكىلدەرىنىڭ مالىمەتىنشە، مۇزدىڭ بولىنۋىنەن ادام شىعىنى تىركەلمەگەن جانە ەشقانداي نىسانعا زالال كەلمەگەن. دەگەنمەن ساراپشىلاردىڭ ايتۋىنشا، الداعى ۋاقىتتا قاتتى جاۋىن-شاشىن بولسا، كەيبىر ەلدى مەكەندەردى سۋ باسۋ قاۋپى جوعارى.
