قازاقستان ەۋروپالىق ەلدەر ءۇشىن ەنەرگەتيكالىق ىنتىماقتاستىق سالاسىندا رەسەيگە بالاما بولا الادى. بۇل تۋرالى فينليانديا پرەزيدەنتى الەكساندر ستۋبب «قازاقپارات» اگەنتتىگىنە بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
«ەۋروپا بىرتىندەپ رەسەيدىڭ سۇيىتىلعان گازى بەن مۇنايىنان باس تارتىپ جاتىر. 80 پايىزدان استام قىسقارۋ بالاما ەنەرگيا كوزدەرىنە سۇرانىستى ارتتىرادى. وسى تۇرعىدا قازاقستان ماڭىزدى ءرول اتقارادى»، — دەدى ستۋبب.
ول سونداي-اق ەۋروپالىق وداقتىڭ قازاقستاننىڭ ەڭ ءىرى ساۋدا سەرىكتەسى ەكەنىن ەسكە سالدى.
فينليانديا پرەزيدەنتى استاناداعى كەلىسسوزدەر بارىسىندا قاسىم-جومارت توقاەۆتىڭ رەسەي مەن قىتايعا قاتىستى پىكىرىن جوعارى باعالايتىنىن اتاپ ءوتتى.
«فينليانديا مەن قازاقستان سياقتى شاعىن جانە ورتا دەرجاۆالاردىڭ ءوز قۇندىلىقتارى مەن مۇددەلەرى بار، بىراق ولاردىڭ ىقپال ەتۋ مۇمكىندىكتەرى شەكتەۋلى. دەگەنمەن ءبىز دەلدالدىق ءرول اتقارىپ، پىكىر الماسۋعا، حابار جەتكىزۋگە ۇلەس قوسا الامىز. مىسالى، پرەزيدەنت توقاەۆ الداعى اپتادا اق ۇيگە، ودان كەيىن كرەملگە بارادى. بۇل – ءارى پرەزيدەنت ترامپتان، ءارى پرەزيدەنت پۋتيننەن وزەكتى اقپارات الىپ، ونى باسقا تاراپتارعا جەتكىزۋگە جاقسى مۇمكىندىك. مەن فينليانديا دا، قازاقستان دا حالىقارالىق قاتىناستاردا ماڭىزدى رولگە يە دەپ ەسەپتەيمىن»، — دەدى الەكساندر ستۋبب.
ايتا كەتەيىك، فينليانديا پرەزيدەنتى الەكساندر ستۋبب 28–29 قازاندا قاسىم-جومارت توقاەۆتىڭ شاقىرۋىمەن استاناعا رەسمي ساپارمەن كەلگەن ەدى. كەزدەسۋ بارىسىندا بەيبىت ماقساتتا يادرولىق ەنەرگيانى پايدالانۋ جانە وزگە دە سالالاردا ىنتىماقتاستىق جونىندە 15 قۇجاتقا قول قويىلدى.
