بەلگىلى مۋزىكاتانۋشى، ونەرتانۋ كانديداتى، قازاقتىڭ ءداستۇرلى مۋزىكاسىن زەرتتەۋشى جانە ۇستاز ءاليا سابىروۆا 58 جاسىندا ومىردەن ءوتتى. قايعىلى حاباردى قۇرمانعازى اتىنداعى قازاق ۇلتتىق كونسەرۆاتورياسى جەتكىزدى، دەپ حابارلايدى "ادىرنا".
ءاليا سابىروۆا وتىز جىلعا جۋىق ۋاقىت بويى ءداستۇرلى مۋزىكالىق مادەنيەتتەر مەن تۇركى الەمى مۋزىكاسىنا ارنالعان پاندەردى وقىتتى. ول قازاقستاندا العاش رەت «الەم حالىقتارىنىڭ مۋزىكاسى» اتتى وقۋ كۋرسىن جاساپ، اۆتورلىق باعدارلامالار ەنگىزدى.
عالىمنىڭ جەتەكشىلىگىمەن 50-گە جۋىق ماگيسترلىك جانە 3 دوكتورلىق ديسسەرتاتسيا قورعالدى. ول كونسەرۆاتوريانىڭ عىلىم حاتشىسى، سونداي-اق قازاق جانە شەتەل مۋزىكا تاريحى كافەدراسىنىڭ مەڭگەرۋشىسى قىزمەتتەرىن اتقاردى.
«2009–2010 جىلدارى ءاليا سۇلتانمۇراتقىزى «مۋزىكا الەمىندە ۆ ميرە مۋزىكي» جۋرنالىنىڭ باس رەداكتورى بولدى. سونىمەن قاتار، ول تەلەباعدارلامالار جۇرگىزىپ، عىلىمي ەكسپەديتسيالارعا قاتىسىپ، ىرگەلى مۋزىكالىق ەڭبەكتەردى رەداكتسيالادى. ءاليا سابىروۆانىڭ عىلىمي ىزدەنىستەرىنىڭ وزەگى اباي مەن شاكارىم شىعارماشىلىعى بولدى. ونىڭ ديسسەرتاتسياسى مەن عىلىمي ماقالالارىندا قازاقتىڭ رۋحاني جانە مۋزىكالىق ءداستۇرىنىڭ تەرەڭ قاباتتارى جان-جاقتى زەرتتەلدى»، - دەپ حابارلادى قۇرمانعازى اتىنداعى قازاق ۇلتتىق كونسەرۆاتورياسى.
ارىپتەستەرى ءاليا سۇلتانمۇراتقىزىن ەڭبەكقور، جاڭاشىل، كاسىبىنە ادال عالىم رەتىندە سيپاتتايدى. ول ستۋدەنتتەرمەن تەڭ دارەجەدە سويلەسىپ، ولاردىڭ دەربەس ويلاۋ قابىلەتىن دامىتۋعا زور ءمان بەردى. ءار ساباقتا دالدىك پەن عىلىمي نەگىزدى تالاپ ەتتى.
