ەندى ۇكىمەت «وتباسى بانك» سالىمشىلارىنا جىل سايىنعى سىياقى تولەمەيدى. بۇل تۋرالى بۇگىن، 22 قازاندا ءماجىلىستىڭ جالپى وتىرىسىندا قارجى ءمينيسترى ءمادي تاكيەۆ ايتتى، دەپ حابارلايدى «ادىرنا» ءتىلشىسى.
«وتباسى بانك» دەپوزيتتەرى بويىنشا سالىمشىلارعا بەرىلەتىن سىياقىنى بانكتىڭ ءوز قاراجاتى ەسەبىنەن قارجىلاندىرۋ تۋرالى شەشىم قابىلداندى. وسىلايشا ءبىز بيۋدجەتكە تۇسەتىن جۇكتەمەنى ازايتامىز. ال سالىمشىلار ءۇشىن ەشتەڭە وزگەرمەيدى»،— دەدى ول.
ءمينيستردىڭ ايتۋىنشا، «وتباسى بانككە» 12 جىل ىشىندە بيۋدجەتتەن شامامەن 900 ملرد تەڭگە بولىنگەن. ال قازىرگى ءۇش جىلدىق بيۋدجەتتە تاعى شامامەن 200 ملرد تەڭگە قاراستىرىلعان. سونىڭ ناتيجەسىندە سالىمشىلار سانى 10 ەسەگە ءوسىپ، 2,1 ميلليون ادامعا جەتكەن.
ءمادي تاكيەۆ «وتباسى بانك» مەملەكەتتىك قارجى ينستيتۋتى ەكەنىن جانە ونىڭ قارجىلىق جاعدايى تۇراقتى ەكەنىن اتاپ ءوتتى. 2024 جىلدىڭ قورىتىندىسى بويىنشا بانكتىڭ تازا پايداسى 120 ملرد تەڭگەنى قۇراعان.
