قىرعىزستاننىڭ ىشكى ىستەر مينيسترلىگى تانىمال بوكسشى دميتري بيۆولدىڭ بۇرىنعى جۇبايى ەكاتەرينا بيۆولعا قاتىستى تەرگەۋگە دەيىنگى تەكسەرىس باستادى، دەپ حابارلايدى «ادىرنا» ءتىلشىسى.
بۇعان دەيىن الەۋمەتتىك جەلىدە ايەلدىڭ ءارتۇرلى ۇلت وكىلىنە، سونىڭ ىشىندە قازاق پەن قىرعىز حالقىن قورلايتىن سوزدەر ايتقان ۆيدەوسى تاراعان ەدى.
«مۇنداي ارەكەتتەرگە جول بەرۋگە بولمايدى. ول ۇلتارالىق سىيلاستىق پەن توزىمدىلىك قاعيداتتارىنا قايشى كەلەدى. تۇراتىن جەرىنە قاراماستان، ءار ادام مورالدىق جانە قۇقىقتىق نورمالاردى ساقتاۋعا، ارازدىق پەن وشپەندىلىكتى قوزدىرماۋعا مىندەتتى. قازىرگى ۋاقىتتا بۇل فاكت تىركەلىپ، ءتيىستى ساراپتامالار تاعايىندالدى»,–دەپ پىكىر ءبىلدىردى قىرعىزستان ءىىم.
مينيسترلىك تەكسەرۋدى سوڭىنا دەيىن جەتكىزىپ، ايەلدىڭ ارەكەتىنە قۇقىقتىق باعا بەرىلەتىنىن مالىمدەدى.
ايتا كەتەيىك، ەكاتەرينا بيۆول — رەسەيلىك ءارى قىرعىزستاندىق بوكسشى، WBA, WBO جانە IBF نۇسقالارى بويىنشا جارتىلاي اۋىر سالماقتاعى الەم چەمپيونى دميتري بيۆولدىڭ بۇرىنعى جۇبايى. ەرلى-زايىپتىلار 2023 جىلى اجىراسىپ كەتكەن. ايىرىلىسۋدان كەيىن ەكاتەرينا الەۋمەتتىك جەلىلەردە بەلسەندى بولا باستادى. ول بۇرىنعى كۇيەۋىن تابىستارىن جاسىرىپ، اليمەنت كولەمىن ازايتۋعا تىرىستى دەپ ايىپتاپ، سونداي-اق ونىڭ جانكۇيەرلەرىن دە سىنعا العان.
