18 قازان ءتۇنى كوكشەتاۋ قالاسىندا پاترۋلدىك پوليتسيا قىزمەتكەرلەرى دۇكەن ماڭىنان شىققان BMW ماركالى اۆتوكولىكتى بايقاپ، جۇرگىزۋشىنىڭ كۇدىكتى ارەكەتىنە نازار اۋدارعان. پوليتسەيلەر توقتاۋ تۋرالى بەلگى بەرگەن، الايدا جۇرگىزۋشى بۇل تالاپتى ەلەمەي، وقيعا ورنىنان قاشىپ كەتۋگە تىرىسقان، دەپ حابارلايدى “ادىرنا”.
كولىك يەسى جوعارى جىلدامدىقپەن كەلە جاتىپ رولگە يە بولا الماي، جول جيەگىندەگى مەتالل قورشاۋعا سوعىلعان. ابىروي بولعاندا، ەشكىم زارداپ شەكپەگەن.
تەكسەرۋ كەزىندە جۇرگىزۋشىنىڭ ورتاشا دارەجەدە ماس بولعانى انىقتالدى. سونىمەن قاتار، ول بۇعان دەيىن دە ءدال وسىنداي قۇقىق بۇزۋشىلىق جاساپ، ەكى جىل بۇرىن جۇرگىزۋشى كۋالىگىنەن ايىرىلعانى بەلگىلى بولدى.
قازىرگى ۋاقىتتا اتالعان دەرەك بويىنشا سوتقا دەيىنگى تەرگەۋ باستالدى. ساراپتاما قورىتىندىسى جۇرگىزۋشىنىڭ ماس كۇيدە بولعانىن راستادى.
پوليتسيا دەپارتامەنتى ازاماتتاردى ماس كۇيدە كولىك جۇرگىزبەۋگە شاقىرادى. بۇل — تەك اكىمشىلىك ەمەس، قىلمىستىق جاۋاپكەرشىلىككە اكەپ سوعاتىن اۋىر قۇقىق بۇزۋشىلىق.
