وكسفورد ۋنيۆەرسيتەتىنىڭ «ازيا جانە تاياۋ شىعىس زەرتتەۋلەرى» فاكۋلتەتىندە وزبەك جانە كونە وزبەك تىلدەرى وقىتىلاتىن بولدى. بۇل تۋرالى وزبەكستان پرەزيدەنتى اكىمشىلىگىنىڭ باسشىسى سايدا ميرزيوەۆا ءوزىنىڭ Telegram-ارناسىندا جازدى، دەپ حابارلايدى «ادىرنا» ءتىلشىسى.
ول ۋنيۆەرسيتەتتەن ماراپات العانىن جانە بۇل ماراپاتتى وزبەكستان پرەزيدەنتىنىڭ باسشىلىعىمەن ەلدەگى ايەلدەردىڭ قۇقىقتارىن قورعاۋ مەن ولاردىڭ مۇمكىندىكتەرىن كەڭەيتۋ باعىتىندا قول جەتكىزىلگەن پروگرەستىڭ مويىندالۋى رەتىندە قابىلدايتىنىن اتاپ ءوتتى.
ساپار اياسىندا سايدا ميرزيوەۆا بودليان كىتاپحاناسىنا دا بارىپ، ەرەكشە اسەر العانىن جەتكىزدى. وندا ميرزو ۇلىقبەكتىڭ «زيدج گۋرگاني» ەڭبەگى، الىشەر ناۋايدىڭ «حامساسى»، حۇسايىن بايقارانىڭ «ديۋان ءحۋساينيى»، سونداي-اق بابىر اۋلەتى داۋىرىنە ءتان مينياتيۋرالار مەن وزگە دە بىرەگەي تاريحي جادىگەرلەر ساقتالعان.
