قر سىرتقى ىستەر مينيسترلىگى ERG كومپانياسىنىڭ يەلەرىنىڭ ءبىرى پاتوح شوديەۆتىڭ قىزى مۋنيسا شوديەۆاعا ديپلوماتيالىق پاسپورت بەرىلگەنى تۋرالى اقپاراتتى راستاي المادى، دەپ حابارلايدى "ادىرنا" ۇلتتىق پورتالى Nege.Aqsha-عا سىلتەپ.
ۆەدومستۆونىڭ تۇسىندىرۋىنشە، قازاقستاندا ديپلوماتيالىق پاسپورتتار بەس جىل مەرزىمگە بەرىلەدى جانە مەرزىمى اياقتالعان سوڭ جويىلادى. ال مۇنداي قۇجاتتاردى راسىمدەۋگە قاتىستى ماتەريالدار ون جىل بويى ساقتالىپ، كەيىن جويىلادى.
«وسىعان بايلانىستى مۋنيسا شوديەۆا اتىنا ديپلوماتيالىق پاسپورت بەرىلگەنىن راستاۋ مۇمكىن ەمەس»، — دەلىنگەن مينيسترلىكتىڭ رەسمي جاۋابىندا.
بۇعان دەيىن «ۆىحود ك موريۋ» اتتى Telegram-ارناسى مەملەكەتتىك دەرەكتەر بازاسىنداعى اقپاراتتارعا سۇيەنە وتىرىپ، مۋنيسا شوديەۆا 2003 جىلى قازاقستاننىڭ ديپلوماتيالىق پاسپورتىن العانىن، ال ون جىلدان كەيىن (2013 جىل) ونىڭ جاڭارتىلعانىن حابارلاعان ەدى.
دەرەككوزدىڭ مالىمەتىنشە، سول كەزدە شوديەۆا بەلگيا مەن رەسەي ازاماتتىعىنا يە بولعان، بۇل قازاقستان كونستيتۋتسياسىنا قايشى كەلەدى. ويتكەنى ەلدە قوس ازاماتتىققا جول بەرىلمەيدى.
سونىمەن قاتار، جاريالانعان اقپاراتتا شوديەۆاعا ديپلوماتيالىق پاسپورت بەرۋگە نەگىز بولماعانى، سەبەبى ول ەشقاشان مەملەكەتتىك قىزمەت اتقارماعان جانە قازاقستاندا تۇرماعانى ايتىلعان.
قر ءسىم وكىلدەرى بۇل اقپاراتتى ناقتى راستاۋ نەمەسە تەرىسكە شىعارۋ مۇمكىن ەمەستىگىن مالىمدەدى.
ايتا كەتەيىك، وسىعان دەيىن شوديەۆتىڭ قىزىنا قاتىستى اقپارات تاراتقان ەدىك.
