ءىىم ويىن-ساۋىق ورتالىعىنداعى داۋ-داماي تۋرالى ايتىپ، دەپۋتاتتارعا "شۇيلىكتى", دەپ حابارلايدى "ادىرنا" ۇلتتىق پورتالى.
قوعامداعى قاۋىپسىزدىك پەن ءتارتىپ ماسەلەلەرىنە ارنالعان كوشپەلى ۇكىمەت ساعاتىندا ءىىم-گە ويىن-ساۋىق ورىندارىنىڭ سانىن قىسقارتۋ جونىندە سۇراق قويىلدى.
ءماجىلىس دەپۋتاتى دانابەك يسابەك 102 نومىرىنە كەلىپ تۇسەتىن قوڭىراۋلاردىڭ كوبى تۇنگى ۋاقىتتا جانە دەمالىس كۇندەرى تىركەلەتىنىن ايتىپ، ويىن-ساۋىق ورىندارىنىڭ قاۋىپسىزدىك دەڭگەيىن باعالاۋ رەيتينگى قانداي ناتيجە بەرىپ جاتقانىن سۇرادى.
مينيستر ەرجان سادەنوۆ رەيتينگ ەنگىزۋ ماسەلەنى تۇبەگەيلى شەشپەيتىنىن اتاپ ءوتتى.
"قازىر رەيتينگ بويىنشا وسىنداي 193 ويىن-ساۋىق ورتالىعى بار. ول جەردە قىلمىس، بۇزاقىلىق جاسالعان. وسىنداي مەكەمەلەردى انىقتاپ، ءوزىمىزدىڭ سايتتارعا جاريالاپ، اكىمدىكتەرگە جەتكىزەمىز. نە ءۇشىن؟ حالىق كورىپ، ءوزى قورىتىندى شىعارۋ كەرەك. ول جەردە تاعامى ءتاتتى بولسا، ويىن-ساۋىق ۇيىمداستىرۋ ماسەلەسى دۇرىس بولسا، سول رەيتينگكە قاراماستان ەل بارىپ جاتادى. ونى ءبىز بىلەمىز، ءبارىمىز كۋامىز. كەيبىرەۋلەرىڭىز باراتىن دا شىعارسىزدار... بىلەمىز عوي، ونى، قالاي ەكەنىن", - دەپ جاۋاپ بەردى مينيستر.
سونداي-اق وتىرىس بارىسىندا اسكەردەگى ءولىم-ءجىتىم ماسەلەسى دە ءسوز بولدى.
