الەمدىك رەيتينگىندە 25-ورىندا تۇرعان قازاقستاندىق سپورتشى زاڭعار نۇرلانۇلى كورەيانىڭ چحۋنچحون قالاسىندا وتكەن ITF Juniors J200 ساناتىنداعى ءتۋرنيردىڭ جەڭىمپازى اتاندى، دەپ حابارلايدى “ادىرنا”.
قازاقستان تەننيس فەدەراتسياسى تاراتقان مالىمەتكە سايكەس، جارىستا ول ءبىرىنشى ءنومىرلى سپورتشى رەتىندە تىركەلدى. فينالدا زاڭعار كورەيالىق مين حۋك چونى 6:3, 6:4 ەسەبىمەن سەنىمدى تۇردە ۇتتى. تۋرنير بارىسىندا قازاقستاندىق تەننيسشى قارسىلاستارىنا بىردە-ءبىر سەتبەرگەن جوق.
بۇل جەڭىس زاڭعار نۇرلانۇلىنىڭ ITF Juniors اياسىنداعى جەكەلەي سىنداعى التىنشى تيتۋلى بولدى. بۇعان دەيىن ول J100 Aizkraukle, J200 Shymkent, J100 Izmir, J30 Tsaghadzor, J30 Trnava تۋرنيرلەردە توپ جارعان بولاتىن.
كەلەسى اپتادا زاڭعار كورەيانىڭ ۆوندجۋ قالاسىندا وتەتىن ITF Juniors J300 تۋرنيرىندە باق سىنايدى. بۇل دودا 18 جاسقا دەيىنگى ويىنشىلار اراسىنداعى بەيرەسمي ازيا چەمپيوناتى سانالادى.
