قازاقستان ۇلتتىق قۇراماسىنا ۋاقىتشا جاڭا باس باپكەر تاعايىندالدى. بۇل قىزمەتتى تالعات بايسۋفينوۆ اتقارادى، دەپ حابارلايدى "ادىرنا" ۇلتتىق پورتالى.
فۋتبولدا ۇلتتىق قۇرامانىڭ جاڭا باپكەرى بولىپ تالعات مارۋاۇلى تاعايىندالدى. الايدا ماماننىڭ بۇل قىزمەتى "ۋاقىتشا" ەكەنى اتالدى.
«تالعات مارۋاۇلى ۇلتتىق قۇرامانى 2026 جىلعى الەم چەمپيوناتىنىڭ ىرىكتەۋ كەزەڭى اياسىندا وتەتىن ليحتەنشتەين (10 قازان) جانە سولتۇستىك ماكەدونيامەن (13 قازان) بولاتىن ويىندارعا دايىندايدى»، — دەلىنگەن قازاقستان فۋتبول فەدەراتسياسىنىڭ رەسمي حابارلاماسىندا.
سونىمەن قاتار، قفف قازىرگى ۋاقىتتا ۇلتتىق قۇرامانىڭ جاڭا باس باپكەرىن انىقتاۋ ءۇشىن كەلىسسوزدەر جۇرگىزىپ جاتقانىن مالىمدەدى. ۇمىتكەرلەر قاتارىندا ءۇش شەتەلدىك مامان بار.
ەسكە سالا كەتەيىك، وسىعان دەيىن «رەال مادريد» كلۋبىنىڭ باس باپكەرى حابي الونسو الماتىلىق «قايراتتىڭ» ويىنىنا جوعارى باعا بەرىپ، ولاردىڭ ءوز الاڭىنداعى سەنىمدى ونەرى يسپاندىقتار ءۇشىن ەلەۋلى سىناق بولۋى مۇمكىن ەكەنىن ايتقان.
