سولتۇستىك قازاقستان وبلىسىندا شەتەلدىك ازاماتتارعا زاڭسىز تۇردە جۇزدەگەن جەكە سايكەستەندىرۋ ءنومىرى (جسن) بەرىلگەنى انىقتالدى، دەپ حابارلايدى "ادىرنا" ۇلتتىق پورتالى.
بۇل تۋرالى قر باس پروكۋراتۋراسىنىڭ ءباسپاسوز قىزمەتى مالىمدەدى.
ۆەدومستۆو دەرەگىنشە، «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ وبلىستىق فيليالى زاڭ تالاپتارىن ورەسكەل بۇزىپ، قازاقستان اۋماعىنا كەلمەگەن شەتەلدىكتەرگە 720 جسن راسىمدەگەن.
پروكۋرورلىق قاداعالاۋ ناتيجەسىندە كىنالى تۇلعالار جاۋاپكەرشىلىككە تارتىلىپ، زاڭسىز بەرىلگەن جسن-دەردى جويۋ شارالارى قولعا الىندى.
سونىمەن قاتار، 3 شىلدەدە پەتروپاۆل قالاسى مەن م. جۇماباەۆ اۋدانىنىڭ پوليتسيا ورگاندارى قىلمىستىق كودەكستىڭ 206-بابى 2-بولىگى («اقپاراتتى زاڭسىز جويۋ نەمەسە وزگەرتۋ») بويىنشا سوتقا دەيىنگى تەرگەۋدى باستاعان. قازىرگى ۋاقىتتا تەرگەۋ امالدارى جۇرگىزىلىپ جاتىر.
ءىس وبلىستىق پروكۋراتۋرانىڭ ەرەكشە باقىلاۋىنا الىنعان.
