مولدوۆا پارلامەنتىندە وتكەن سايلاۋدا پرەزيدەنت مايا ساندۋ جەتەكشىلىك ەتەتىن پروەۆروپالىق «ارەكەت جانە ىنتىماق» (PAS) پارتياسى جەڭىسكە جەتتى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
الدىن الا دەرەكتەر بويىنشا، پارتيا 50,14% داۋىس جيناپ، 101 ورىننىڭ 54-ءىن يەلەنگەن. بۇل وتكەن شاقىرىلىمداعى 61 ورىننان از بولسا دا، پارتيا جاڭا پارلامەنتتە نەگىزگى كۇشكە اينالىپ وتىر.
سونىمەن قاتار، تاعى ءبىر پروەۆروپالىق ساياسي ۇيىم – «التەرناتيۆا» بلوگى سەگىز مانداتقا يە بولدى. ال رەسەيشىل «پاتريوتتىق بلوك» 24,20% جيناپ، 27 دەپۋتاتتىق ورىنعا قول جەتكىزدى. بۇل بلوكقا بۇرىنعى پرەزيدەنتتەر يگور دودون (سوتسياليستەر پارتياسى), ۆلاديمير ۆورونين (كوممۋنيستەر پارتياسى), سونداي-اق ەكس-پرەمەر ۆاسيلي تارلەۆ (2001–2008 جىلدارى باسقارعان) جەتەكشىلىك ەتەدى.
پارلامەنتكە بۇدان بولەك ەكى پارتيا ءوتتى: ۇلتتىق-كونسەرۆاتور ۆاسيلە كوستيۋك باسقاراتىن، مولدوۆانى رۋمىنيامەن بىرىكتىرۋدى قولدايتىن «ۇيدەگى دەموكراتيا» جانە پوپۋليست رەناتو ۋساتىي جەتەكشىلىك ەتەتىن ء«بىزدىڭ پارتيا».
سايلاۋ ناۋقانى كەزىندە بيلىك پەن وپپوزيتسيا ءبىر-ءبىرىن زاڭبۇزۋشىلىقتار مەن فالسيفيكاتسياعا دايىندىقپەن ايىپتادى. داۋىس بەرۋ قارساڭىندا جاپپاي تارتىپسىزدىك ۇيىمداستىرماق بولدى دەگەن كۇدىكپەن بىرنەشە ونداعان ادام ۇستالدى. سونداي-اق رەسەيدە جاسىرىنىپ جۇرگەن كاسىپكەر يلان شوردىڭ «سايلاۋ جەلىسى» ارقىلى پارا بەرىپ، مىڭداعان سايلاۋشىنى باقىلاۋعا العانى تۋرالى دەرەكتەر جاريالاندى. BBC زەرتتەۋىندە بۇل جەلىنىڭ رەسەي قارجىسىنا سۇيەنىپ، دەزينفورماتسيا تاراتقانى ايتىلدى.
ال «پاتريوتتىق بلوك» جەتەكشىلەرى ناتيجەلەرمەن كەلىسپەي، پارلامەنت الدىندا ميتينگكە شىعۋعا شاقىردى. جەكسەنبى كۇنى كەشكىسىن يگور دودون مەن ۆاسيلي تارلەۆ جاقتاستارىمەن بىرگە ورتالىق سايلاۋ كوميسسياسى عيماراتى الدىندا نارازىلىق اكتسياسىن وتكىزدى.
