بۇگىن قازاقستاننىڭ بارلىق وڭىرىندە قر كاسىپوداقتار فەدەراتسياسى جانە ونىڭ مۇشەلىك ۇيىمدارى «تازا قازاقستان – بولاشاق ءۇشىن» اتتى كەڭ اۋقىمدى ەكولوگيالىق اكتسيا وتكىزدى. ءىس-شارا مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «تازا قازاقستان» اكتسياسى اياسىندا ۇيىمداستىرىلىپ، ەڭبەك كۇنىنە، قازاقستانداعى كاسىپوداق قوزعالىسىنىڭ 120 جىلدىعىنا جانە قركف-نىڭ 35 جىلدىعىنا ارنالدى، دەپ حابارلايدى «ادىرنا» ۇلتتىق پورتالى.
اكتسيانىڭ باستى ماقساتى – ەلدەگى ەكولوگيالىق جاعدايدى جاقسارتۋعا ۇلەس قوسۋ، اۋماقتاردى اباتتاندىرۋ، سونداي-اق ازاماتتاردىڭ تابيعاتتى قورعاۋعا دەگەن جاۋاپكەرشىلىگىن ارتتىرۋ بولدى.
استاناداعى نەگىزگى ءىس-شاراعا قركف اپپاراتىنىڭ قىزمەتكەرلەرى مەن فەدەراتسيا توراعاسى ساتىبالدى داۋلەتالين قاتىسىپ، تۇران داڭعىلى بويىنا 50 ءتۇپ اعاش (ۇيەڭكى مەن تال) وتىرعىزدى. بۇل قادام كاسىپوداق قوزعالىسىنىڭ تامىرىن تەرەڭدەتىپ، ءوسىپ-وركەندەۋىن بەينەلەيتىن سيمۆولعا اينالدى.
ساتىبالدى داۋلەتالين اكتسيانى «پروفسويۋزداردىڭ بىرلىك كۇنى» دەپ اتادى:
«بۇل جاي عانا سەنبىلىك ەمەس – بۇل ءبىزدىڭ بولاشاققا دەگەن كوزقاراسىمىزدى بىلدىرەدى. بۇگىن كەنشىلەر، مەتاللۋرگتەر، دارىگەرلەر، مۇعالىمدەر جانە وزگە دە ەڭبەك ادامدارى قاتىسىپ وتىر. بۇل – ەلدىڭ رۋحىن كوتەرەتىن، ەكولوگيالىق مادەنيەتتى قالىپتاستىراتىن، بىرلىگىمىزدى كورسەتەتىن شارا»، – دەدى ول.
ەكولوگيالىق باستاما ەلىمىزدىڭ بارلىق ءوڭىرىن قامتىدى. مىڭداعان كاسىپوداق مۇشەلەرى مەن ەرىكتىلەر قاتىسىپ، 500-دەن استام اعاش وتىرعىزدى، 20 گەكتاردان اسا اۋماقتى تازالادى جانە شامامەن 2 توننا قوقىس جينادى.
ماسەلەن، تۇركىستان قالاسى مەن وبلىستىڭ بىرقاتار اۋداندارىندا سانيتارلىق جۇمىستار جۇرگىزىلدى. شىعىس قازاقستانداعى ۇلان اۋدانىندا جاڭا مۋزىكالىق مەكتەپ اۋماعىنا شىرشالار ەگىلدى. باتىس قازاقستاندا كاسىپوداق بەلسەندىلەرى «اسىل ميراس» بالالار ورتالىعىنىڭ اۋماعىن كوگالداندىردى. قاراعاندىدا 80-نەن استام كاسىپوداق مۇشەسى ۇلتتىق ەڭبەك گيگيەناسى ورتالىعىنىڭ اۋماعىن تازالادى. جامبىل وبلىسىندا 140-قا جۋىق كاسىپوداق مۇشەسى ارشا وتىرعىزىپ، تارازداعى سكۆەردى اباتتاندىردى. پاۆلوداردا وزەن جاعالاۋى مەن شاڭعى بازاسىندا سەنبىلىك ءوتتى.
ايتا كەتەرلىگى، اكتسياعا قاراپايىم تۇرعىندار دا قوسىلدى. استانالىق زەينەتكەر قوبلاندى بازارباەۆ جاستار مەن كاسىپوداقتاردىڭ ەڭبەگىنە ءتانتى بولىپ، بۇل كۇندى «ناعىز ەڭبەك پەن بىرلىك مەرەكەسى» دەپ اتادى.
قركف باسشىلىعى مۇنداي شارالاردى تۇراقتى تۇردە وتكىزۋ جوسپارلانىپ وتىرعانىن حابارلادى. ساتىبالدى داۋلەتالين بارلىق قاتىسۋشىلارعا العىس ءبىلدىرىپ:
«ەكولوگيالىق جاۋاپكەرشىلىك – ءبىر رەتتىك اكتسيا ەمەس، ءومىر سالتى. بۇگىنگى كۇن ەلىمىزدىڭ بولاشاعى ءۇشىن بىرلىكتىڭ، ىنتىماقتىڭ جانە ورتاق قۇندىلىقتاردىڭ ۇلگىسى بولدى. ءبىز بىرگە بولعاندا – مىقتىمىز»، – دەدى.
ەسكە سالا كەتسەك، «تازا قازاقستان» – 2023 جىلدىڭ ساۋىرىندە پرەزيدەنت قاسىم-جومارت توقاەۆتىڭ باستاماسىمەن باستالعان رەسپۋبليكالىق ەكولوگيالىق اكتسيا. سول ۋاقىتتان بەرى كاسىپوداقتار تابيعاتتى قورعاۋ ءىسىن قولداپ، ازاماتتاردى تۋعان جەرگە دەگەن جاۋاپكەرشىلىككە تاربيەلەۋگە اتسالىسىپ كەلەدى.
