Bügın Qazaqstannyŋ barlyq öŋırınde QR käsıpodaqtar federasiiasy jäne onyŋ müşelık ūiymdary «Taza Qazaqstan – bolaşaq üşın» atty keŋ auqymdy ekologiialyq aksiia ötkızdı. Is-şara Memleket basşysy Qasym-Jomart Toqaevtyŋ bastamasymen qolǧa alynǧan «Taza Qazaqstan» aksiiasy aiasynda ūiymdastyrylyp, Eŋbek künıne, Qazaqstandaǧy käsıpodaq qozǧalysynyŋ 120 jyldyǧyna jäne QRKF-nyŋ 35 jyldyǧyna arnaldy, dep habarlaidy «Adyrna» ūlttyq portaly.
Aksiianyŋ basty maqsaty – eldegı ekologiialyq jaǧdaidy jaqsartuǧa üles qosu, aumaqtardy abattandyru, sondai-aq azamattardyŋ tabiǧatty qorǧauǧa degen jauapkerşılıgın arttyru boldy.
Astanadaǧy negızgı ıs-şaraǧa QRKF apparatynyŋ qyzmetkerlerı men Federasiia töraǧasy Satybaldy Dauletalin qatysyp, Tūran daŋǧyly boiyna 50 tüp aǧaş (üieŋkı men tal) otyrǧyzdy. Būl qadam käsıpodaq qozǧalysynyŋ tamyryn tereŋdetıp, ösıp-örkendeuın beineleitın simvolǧa ainaldy.
Satybaldy Dauletalin aksiiany «profsoiuzdardyŋ bırlık künı» dep atady:
«Būl jai ǧana senbılık emes – būl bızdıŋ bolaşaqqa degen közqarasymyzdy bıldıredı. Bügın kenşıler, metallurgter, därıgerler, mūǧalımder jäne özge de eŋbek adamdary qatysyp otyr. Būl – eldıŋ ruhyn köteretın, ekologiialyq mädeniettı qalyptastyratyn, bırlıgımızdı körsetetın şara», – dedı ol.
Ekologiialyq bastama elımızdıŋ barlyq öŋırın qamtydy. Myŋdaǧan käsıpodaq müşelerı men erıktıler qatysyp, 500-den astam aǧaş otyrǧyzdy, 20 gektardan asa aumaqty tazalady jäne şamamen 2 tonna qoqys jinady.
Mäselen, Türkıstan qalasy men oblystyŋ bırqatar audandarynda sanitarlyq jūmystar jürgızıldı. Şyǧys Qazaqstandaǧy Ūlan audanynda jaŋa muzykalyq mektep aumaǧyna şyrşalar egıldı. Batys Qazaqstanda käsıpodaq belsendılerı «Asyl Miras» balalar ortalyǧynyŋ aumaǧyn kögaldandyrdy. Qaraǧandyda 80-nen astam käsıpodaq müşesı Ūlttyq eŋbek gigienasy ortalyǧynyŋ aumaǧyn tazalady. Jambyl oblysynda 140-qa juyq käsıpodaq müşesı arşa otyrǧyzyp, Tarazdaǧy skverdı abattandyrdy. Pavlodarda özen jaǧalauy men şaŋǧy bazasynda senbılık öttı.
Aita keterlıgı, aksiiaǧa qarapaiym tūrǧyndar da qosyldy. Astanalyq zeinetker Qoblandy Bazarbaev jastar men käsıpodaqtardyŋ eŋbegıne täntı bolyp, būl kündı «naǧyz eŋbek pen bırlık merekesı» dep atady.
QRKF basşylyǧy mūndai şaralardy tūraqty türde ötkızu josparlanyp otyrǧanyn habarlady. Satybaldy Dauletalin barlyq qatysuşylarǧa alǧys bıldırıp:
«Ekologiialyq jauapkerşılık – bır rettık aksiia emes, ömır salty. Bügıngı kün elımızdıŋ bolaşaǧy üşın bırlıktıŋ, yntymaqtyŋ jäne ortaq qūndylyqtardyŋ ülgısı boldy. Bız bırge bolǧanda – myqtymyz», – dedı.
Eske sala ketsek, «Taza Qazaqstan» – 2023 jyldyŋ säuırınde Prezident Qasym-Jomart Toqaevtyŋ bastamasymen bastalǧan respublikalyq ekologiialyq aksiia. Sol uaqyttan berı käsıpodaqtar tabiǧatty qorǧau ısın qoldap, azamattardy tuǧan jerge degen jauapkerşılıkke tärbieleuge atsalysyp keledı.
