الماتى وبلىسىنىڭ پروكۋراتۋراسى مەملەكەتكە قۇندى جەر تەلىمدەرىنىڭ قايتارىلعانىن مالىمدەدى، دەپ حابارلايدى "ادىرنا" ۇلتتىق پورتالى.
ۆەدومستۆونىڭ حابارلاۋىنشا، سوڭعى ءۇش جىلدا جالپى قۇنى 6,1 ملرد تەڭگە بولاتىن 83 مىڭ گەكتار جەر مەملەكەت مەنشىگىنە وتكەن. ونىڭ ىشىندە 21 مىڭ گەكتار جەر (قۇنى 1,6 ملرد تەڭگە) بۇرىنعى جوعارى لاۋازىمدى شەنەۋنىكتەردىڭ، ولاردىڭ تۋىستارىنىڭ جانە Forbes تىزىمىنە ەنگەن تۇلعالاردىڭ يەلىگىندە بولعان.
اتاپ ايتقاندا، بيىل مامىر ايىندا پروكۋراتۋرانىڭ تالاپ-ارىزى بويىنشا قاپشاعاي جاعالاۋىنداعى قۇلىباەۆتار وتباسىنا تيەسىلى جەر مەملەكەتكە قايتارىلدى. بۇعان قوسا، تاعى 9 گەكتار جاعالاۋ اۋماعى دا مەملەكەتكە وتكەن.
پروكۋراتۋرا وكىلدەرىنىڭ ايتۋىنشا، ىلە اۋدانىنداعى جەرلەرگە قاتىستى جۇمىس جالعاسىپ جاتىر.
ەسكە سالساق، قىركۇيەك ايىنىڭ باسىندا الماتى پروكۋراتۋراسى مەملەكەتتىك كىرىستەر دەپارتامەنتى عيماراتىنىڭ ءبىر بولىگىن مەملەكەتكە قايتارعانىن حابارلاعان ەدى.
