ۇلتتىق بىرىڭعاي تەستىلەۋدى حالىقارالىق ستاندارتتارعا ساي قايتا قۇرۋ جوسپارلانۋدا، دەپ حابارلايدى "ادىرنا" ۇلتتىق پورتالى.
بۇل تۋرالى ءبىلىم جانە عىلىم ءمينيسترى ساياسات نۇربەك مالىمدەدى.
اقش-قا ساپارى بارىسىندا قازاقستان پرەزيدەنتى قاسىم-جومارت توقاەۆ الەمگە تانىمال Educational Testing Service (ETS) ۇيىمىنىڭ باس اتقارۋشى ديرەكتورى اميت سەۆاكپەن كەزدەستى. كەزدەسۋ قورىتىندىسى بويىنشا ETS ماماندارىنىڭ قاتىسۋىمەن ارنايى جۇمىس توبى قۇرىلىپ، ۇبت-نىڭ ادىستەمەسى مەن مازمۇنى تۇبەگەيلى قايتا قارالاتىن بولدى.
«الەمدىك دەڭگەيدەگى ۇزدىك ماماندار ۇبت-نى حالىقارالىق دەڭگەيدەگى تەستكە اينالدىرۋعا اتسالىسادى. ءبىز ەڭ ساپالى ادىستەمەنى جانە ەڭ ساپالى سۇراقتاردى ەنگىزەمىز»، – دەدى مينيستر ساياسات نۇربەك.
بۇعان دەيىن ءماجىلىس دەپۋتاتى اسحات ايماعامبەتوۆ جاساندى ينتەللەكت دامۋىن ەسكەرە وتىرىپ، ۇبت ەرەجەلەرىن وزگەرتۋ قاجەتتىگىن كوتەرگەن ەدى.
ەسكە سالا كەتەيىك، بيىل نەگىزگى ۇبت-نى 210 مىڭنان استام تالاپكەر تاپسىردى. ونىڭ ىشىندە 76,5%-ى قازاق تىلىندە، 23,5%-ى ورىس تىلىندە، ال 149 ادام اعىلشىن تىلىندە تاپسىرىپ شىقتى.
