اۋىل شارۋاشىلىعى مينيسترلىگى سيىر ەتى باعاسىنىڭ نەگىزسىز ءوسۋىن تەجەپ وتىرادى. بۇل تۋرالى اشم-ءنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
مينيسترلىكتىڭ مالىمەتىنشە، 1 كيلوگرامم سيىر ەتىنىڭ ورتاشا وزىندىك قۇنى شامامەن 2 800–3 100 تەڭگە ارالىعىندا. ال كوتەرمە ساۋداداعى 15 پايىزدىق ۇستەمەاقىسىمەن ەت قۇنى 3 400–3 500 تەڭگە دەڭگەيىندە قالىپتاسقان.
اشم بۇل باعانى كورشى ەلدەرمەن سالىستىرعاندا قاتتى قىمبات ەمەس دەپ سانايدى.
«سالىستىرىپ قاراساق، كورشىلەس ەلدەردە سيىر ەتىنىڭ بولشەك باعاسى الدەقايدا جوعارى. ماسەلەن، وزبەكستان مەن تاجىكستاندا — 1 كگ ءۇشىن 6 500 تەڭگەگە دەيىن، رەسەيدە — 8 500 تەڭگەگە دەيىن، قىتايدا — 8 000 تەڭگەگە دەيىن، تۇرىكمەنستاندا — 9 000 تەڭگەگە دەيىن، تۇركيادا — 13 000 تەڭگەگە دەيىن باعالانادى»، – دەلىنگەن مينيسترلىك حابارلاماسىندا.
دەگەنمەن مينيسترلىك باعانىڭ نەگىزسىز ءوسۋىن تەجەۋ ماقساتىندا بىرقاتار جۇيەلى شارالار ىسكە اسىرىلاتىنىن حابارلادى. اتاپ ايتقاندا، بورداقىلاۋ الاڭدارى مەن شارۋالار ءۇشىن جەڭىلدەتىلگەن نەسيە باعدارلاماسىن كەڭەيتەدى، ەت وڭدەۋ كاسىپورىندارىن سالىپ، جاڭعىرتۋعا قولداۋ كورسەتەدى.
«مينيسترلىك نەگىزسىز باعانىڭ ءوسۋىن تەجەۋ ءۇشىن جۇيەلى شارالاردى جۇزەگە اسىرۋدى جالعاستىرادى»، – دەپ حابارلايدى مينيسترلىك.
