شىمكەنتتە ءىرى ساۋدا ويىن-ساۋىق ورتالىعى ورتەندى، دەپ حابارلايدى “ادىرنا” ۇلتتىق پورتالى.
ءۇش قاباتتى عيماراتتىڭ ەكىنشى قاباتىنداعى كيىم ساتاتىن دۇڭگىرشەكتە وت تۇتانعان. سول كەزدە ىشتە بىرنەشە ادام بولعان. اسىرەسە ءۇشىنشى قاباتتاعى فيتنەس زالدا جاتتىعىپ جاتقاندار تەرەزەدەن شىعۋعا ءماجبۇر بولدى.
وقيعا ورنىنا جەتكەن ءورت سوندىرۋشىلەر بەس ادامدى قۇتقاردى. ءبىر ادام ويىن-ساۋىق ورتالىعىنىڭ شاتىرىنان تۇسىرىلسە، ەكىنشىسى ارنايى ساتىنىڭ كومەگىمەن ەكىنشى قاباتتىڭ تەرەزەسىنەن شىعارىلدى. قالعان ءۇش ادامدى توتەنشە جاعداي قىزمەتكەرلەرى ىشتەن الىپ شىققان.
تۇتىنگە تۇنشىققانداردى جەدەل جاردەم قىزمەتى الىپ كەتتى. توتەنشە جاعدايلار قىزمەتىنىڭ مالىمەتىنشە، 270 شارشى مەتر اۋماق ورتكە ورانعان.
ء“ورت ساعات 13.27-دە وقشاۋلانىپ، 13.55-تە تولىعىمەن ءسوندىرىلدى. ورتكە دەپارتامەنت تاراپىنان 24 بىرلىك تەحنيكا مەن 90 قىزمەتكەر جۇمىلدىرىلدى. ەكىنشى قابات ورتەنگەنىمەن ءۇشىنشى قاباتتا قاتتى قويۋ ءتۇتىن بولعان. ءورتتىڭ سەبەبى انىقتالاتىن بولادى” - دەدى شىمكەنت قالالىق تجد باستىعىنىڭ ءبىرىنشى ورىنباسارى.
تۇتىنگە تۇنشىققان 6 ادام قالالىق اۋرۋحاناعا جاتقىزىلعان. ءبىر ناۋقاستىڭ جاعدايى ناشارلاپ جانساقتاۋ بولىمىنە اۋىستىرىلعان. قالعان ءۇش ادامنىڭ توكسيكولوگيا بولىمىندە ەم قابىلداپ جاتقانى ايتىلدى. ەكى تۇرعىن العاشقى مەديتسينالىق كومەك كورسەتىلگەن سوڭ ۇيلەرىنە جىبەرىلگەن.
