قۇقىقتىق ءتارتىپ اسكەرىنىڭ اۆتوپاركى جاڭا كولىكتەرمەن تولىقتى. سۋ جاڭا كولىك يەلەنگەن ۇلتتىق ۇلاننىڭ جۇرگىزۋشىلەرى كاسىبي شەبەرلىكتەرىن ەرەكشە تاسىلمەن كورسەتتى. ولار ساپتىق الاڭدا اۆتوكولىكتەردىڭ كومەگىمەن كۇزگى ۆالس ورىنداپ، كوپشىلىكتى قابىلەتتەرىمەن ءتانتى ەتتى.
قازاقستان رەسپۋبليكاسى ءىىم ۇلتتىق ۇلانىنىڭ ەلوردالىق جەدەل قۇراماسىنا قىزمەتتىك اۆتوكولىكتەردى تاپسىرۋدىڭ سالتاناتتى ءراسىمى ءوتتى. ءىس-شارا بارىسىندا جەكە قۇرامعا 32 جاڭا قىزمەتتىك اۆتوكولىكتىڭ كىلتى تابىستالدى.
بۇل تارتۋ ۇلتتىق ۇلان اسكەرىنە استانا قالاسى اكىمدىگىنىڭ قولداۋىمەن بەرىلدى. اتالعان كولىكتەر اسكەري ءبولىمنىڭ ماتەريالدىق-تەحنيكالىق بازاسىن جاڭارتۋعا جانە اسكەري قىزمەتشىلەردىڭ جاۋىنگەرلىك قىزمەتكە دايارلىعىن ارتتىرۋعا باعىتتالدى. جاڭا تەحنيكا قوعامدىق ءتارتىپتى قامتاماسىز ەتۋ، جەدەل ارەكەت ەتۋ جانە وزگە دە قىزمەتتىك-جاۋىنگەرلىك مىندەتتەردى ورىنداۋ ءۇشىن پايدالانىلاتىن بولادى.
ءىس-شاراعا ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى اڭساعان بالتابەكوۆ ارنايى قاتىستى.
ول جاڭا اۆتوكولىكتەردىڭ ەلوردانىڭ قاۋىپسىزدىگىن ساقتاۋدا ايرىقشا ماڭىزعا يە ەكەنىن باسا ايتتى.
«جاڭا اۆتوكولىكتەر سىزدەرگە قىزمەتتىك مىندەتتەردى ءتيىمدى ورىنداۋعا، كەز كەلگەن جاعدايدا جەدەل ءارى باتىل قيمىلداۋعا مۇمكىندىك بەرەدى»، – دەدى گەنەرال-مايور اڭساعان بالتابەكوۆ.
بۇگىندە ۇلتتىق ۇلان اسكەري قىزمەتشىلەرى ەلىمىزدىڭ ءىرى قالالارىندا قوعامدىق قاۋىپسىزدىكتى ساقتاۋ باعىتىندا تاۋلىك بويى ىشكى ىستەر ورگاندارىمەن بىرلەسىپ قىزمەت اتقارۋدا. وسى رەتتە جاڭا اۆتوكولىكتەردىڭ بەرىلۋى ءتارتىپ ساقشىلارىنىڭ قوزعالىسىن جەدەلدەتىپ، ءىس-قيمىل مۇمكىندىكتەرىن ارتتىرادى.
ايتا كەتەيىك، وسىنداي سۋ جاڭا اۆتوكولىكتەر قۇقىقتىق ءتارتىپ اسكەرىنىڭ الماتى قالاسىنداعى بولىمىنە دە جەتكىزىلدى.
جاڭا كولىك تىزگىندەگەن جاۋىنگەرلەر قۋانىشتى ءساتتى ايرىقشا اتاپ ءوتتى. ولار سۋ جاڭا كولىكتەردى قاز-قاتار تۇرعىزىپ، ۆالس ءبيىن ۇسىندى. اۆتوكولىكتەردى اسقان شەبەرلىكپەن باسقارا بىلگەن جاۋىنگەرلەر جاڭا تەحنيكانىڭ قانشالىقتى يكەمدى ءارى ىڭعايلى ەكەنىن بي ارقىلى بايقاتتى.
ەندىگىدە ۇلتتىق ۇلان ساربازدارىنا بەرىلگەن بۇل زاماناۋي تەحنيكالار ءىرى شاھارلاردىڭ قاۋىپسىزدىگىن قامتاماسىز ەتۋ ىسىندە ماڭىزدى ءرول اتقارارى ءسوزسىز.
ەسكە سالايىق، 2025 جىلدىڭ العاشقى جارتىسىندا ۇلتتىق ۇلان اسكەري قىزمەتشىلەرى زاڭسىز اينالىمنان 173 قارۋ-جاراق پەن وق-ءدارىنى، 828 گرامم ەسىرتكىنى تاركىلەپ، تىيىم سالىنعان زاتتاردى وتكىزۋگە قاتىستى 77 ارەكەتتى توقتاتقان ەدى. سونىمەن قاتار، قوعامدىق ءتارتىپتى بۇزعان 10 مىڭعا جۋىق ازامات پوليتسياعا جەتكىزىلىپ، ولاردىڭ 379-ى قىلمىس جاسادى دەگەن كۇدىكپەن ۇستالدى. بۇگىندە ەلىمىزدىڭ ىشكى قاۋىپسىزدىگىن ساقتاۋ ماقساتىندا 7 مىڭنان اسا جاۋىنگەر كۇن سايىن قىزمەت اتقارادى.
