قاراعاندى وبلىسىندا الداعى جىلدارى 120 ينۆەستيتسيالىق جوبا جۇزەگە اسىرىلماق. ونىڭ ىشىندە 29 جوبا بيىل ىسكە قوسىلادى. ءوڭىر تاۋ-كەن ءوندىرىسى مەن قايتا وڭدەۋگە باسىمدىق بەرۋدە: ىستىق مىرىشتاۋ زاۋىتى جۇمىس ىستەپ تۇر، تەلەديدار مەن كىر جۋعىش ماشينا شىعاراتىن ءوندىرىس ىسكە قوسىلدى. بۇل جانە باسقا دا ماسەلەلەر وبلىس اكىمى ەرماعانبەت بولەكپاەۆ توراعالىق ەتكەن جيىندا تالقىلاندى. كەزدەسۋ مەملەكەت باسشىسى قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق ترانسفورماتسيا ارقىلى شەشۋ» اتتى جولداۋىن جۇزەگە اسىرۋعا ارنالدى.
وبلىس اكىمى ەرماعانبەت بولەكپاەۆ ءوڭىر الدىڭعى قاتارلى يدەيالاردى ەنگىزەتىن الاڭعا اينالۋى ءتيىس ەكەنىن اتاپ ءوتتى.
– يندۋستريالىق جۇرەك سانالعان قاراعاندى وبلىسى بۇل مىندەتتەردى ورىنداۋدا كوشباسشىلار قاتارىندا بولۋى كەرەك. بىزدە قۋاتتى وندىرىستىك بازا، بىلىكتى كادرلار جانە ايتارلىقتاي اگرارلىق الەۋەت بار. ءوڭىر قازاقستاننىڭ بولاشاعىنا ارنالعان زەرتحاناسىنا اينالۋعا ءتيىس، مۇندا ءداستۇرلى ءوندىرىس پەن جاڭا تەحنولوگيالار، اۋىر ونەركاسىپ پەن تسيفرلىق شەشىمدەر توعىسۋى قاجەت، – دەدى ەرماعانبەت بولەكپاەۆ.
وبلىس اكىمىنىڭ ورىنباسارى ەرمەك الپىسوۆتىڭ ايتۋىنشا، وڭىردە ينۆەستيتسيا تارتۋ قارقىندى ءجۇرىپ جاتىر. جاڭا جوبالار 20 مىڭنان استام جۇمىس ورنىن قۇرۋعا مۇمكىندىك بەرەدى.
– درايۆەرلەر قاتارىنا ماشينا جاساۋ، رەزەڭكە جانە پلاستماسسا بۇيىمدارىن شىعارۋ، سونداي-اق قايتا وڭدەۋدىڭ جاڭا باعىتتارى جاتادى. «سارىارقا» اەا مەن Saran يندۋستريالىق ايماعى تابىستى جۇمىس ىستەپ تۇر، – دەدى ول. – ينۆەستورلارعا قىزمەت كورسەتۋدىڭ ء«بىر تەرەزە» قاعيداتى بويىنشا جۇمىس ىستەيتىن ورتالىعى بار.
وڭىردە گەولوگيالىق بارلاۋ دامىپ كەلەدى. بۇل مينەرالدىق-شيكىزات بازاسىن كەڭەيتىپ، سيرەك جەر مەتالدارىن قايتا وڭدەيتىن كاسىپورىنداردى ىسكە قوسۋعا مۇمكىندىك بەرەدى.
قاراعاندى وبلىسى ەكونوميكاسىن ءارتاراپتاندىرۋدا قازىردىڭ وزىندە جەتىستىكتەرگە جەتىپ وتىر. وتكەن جىلى ءوڭىر كاسىپورىندارىندا وندىرىلگەن ءونىم كولەمى 3 ترلن تەڭگەدەن استى.
پرەزيدەنت تۇراقتى دامۋدىڭ ماڭىزدىلىعىن اتاپ ءوتتى. قاراعاندى وبلىسىندا Qarmet كومپانياسىنىڭ كاسىپورىندارىندا ءوندىرىستى جاڭعىرتۋ مەن جاڭا تەحنولوگيالاردى ەنگىزۋگە 1,6 ترلن تەڭگە ينۆەستيتسيا قۇيۋ جوسپارلانۋدا.
تۋريزمگە دە ەرەكشە كوڭىل بولىنگەن. مەملەكەت باسشىسى بۇل سالانى ەكونوميكانى دامىتۋعا قوسىمشا سەرپىن بەرەتىن پەرسپەكتيۆالى باعىتتاردىڭ ءبىرى دەپ اتادى. وڭىردە نەگىزگى تۋريستىك ورتالىقتار ايقىندالىپ، جاڭا باعىتتاردى دامىتۋ بويىنشا قادامدار بەلگىلەندى.
جيىندى قورىتىندىلاي كەلە، ەرماعانبەت بولەكپاەۆ جولداۋداعى باستى سىن-قاتەر – تەحنوتسەنتريزمگە نەگىزدەلگەن بولاشاققا دايىندىق ەكەنىن ەسكە سالدى.
– بۇل باستامالار – جۇمىستىڭ باستاماسى عانا. بارشامىز مەملەكەت باسشىسىنىڭ جولداۋىن ساپالى ءارى ۋاقىتىلى جۇزەگە اسىرۋ ءۇشىن كۇش بىرىكتىرۋىمىز قاجەت. جەتىستىك حالىقتىڭ ءال-اۋقاتىنا جانە ەلدىڭ تۇراقتى دامۋىنا تىكەلەي بايلانىستى. سوندىقتان ءبارىمىز بىرگە، ءبىر كوماندا بولىپ ارەكەت ەتۋىمىز كەرەك، – دەپ تۇيىندەدى وبلىس اكىمى.
