رەسەيلىك پروپوگانديست، «Russia Today» ارناسىنىڭ رەداكتورى مارگاريتا سيمونيان اۋىر دەرتكە شالدىقتى. بۇل تۋرالى ول جۋرناليست ۆلاديمير سولوۆەۆكە بەرگەن سۇقباتىندا ايتتى، دەپ حابارلايدى «ادىرنا» ءتىلشىسى.
«باقىتسىزدىق كەلسە، قاقپاڭدى ايقارا اش» دەگەن ءسوز بار. ءبىزدىڭ ۇيدەگى قاقپانى قازىردىڭ وزىندە قيراتىپ تاستادى. وسى اپتادا قورقىنىشتى، اۋىر دەرتكە شالدىققانىمدى ءبىلدىم. مىنا وردەن تۇرعان جەردەن، ياعني كەۋدەمنىڭ سول جاعىنان وتا جاسايدى»، – دەدى سيمونيان.
ول دەنساۋلىعىنا قاراماستان باعدارلاماعا قاتىسقانىن، وسىلايشا مايداندا جۇرگەندەردىڭ وتباسىنا قولداۋ كورسەتكىسى كەلگەنىن ءتۇسىندىردى.
8 قىركۇيەكتە سيمونيان اۋرۋحانادان بايلانىسقا شىعىپ، وتا قالاي وتكەنىن ايتتى.
«بىرنەشە ساعات بۇرىن ناركوزدان شىقتىم. ازىرگە باياۋ جازىپ جاتىرمىن، كەشىرىڭىزدەر. ۋايىمداپ، دۇعا ەتكەن جاندارعا راقمەت. بارلىعى دا جاراتۋشىمىزدىڭ قولىندا. سوعان عانا ءۇمىت ارتامىن»،—دەدى ول.
جۋرناليست ناقتى قانداي اۋرۋعا دۋشار بولعانىن اشىپ ايتپادى. الايدا كوپتەگەن باق ءسۇت بەزىنىڭ قاتەرلى ىسىگى دەگەن بولجام جاساپ وتىر.
ايتا كەتەيىك، بۇعان دەيىن سيمونيان كۇيەۋى تيگران كەوساياننىڭ ەس-ءتۇسسىز كۇيدە كلينيكالىق ءولىم اۋزىندا جاتقانىن مالىمدەگەن ەدى. 2022 جىلى كەوسايان ءوزى جۇرگىزەتىن تەلەباعدارلامالاردىڭ بىرىندە قازاقستاننىڭ اتىنا اۋىر سوزدەر ايتىپ، بالاعاتتاعان ەدى. سول جىلدىڭ ماۋسىمىندا سىرتقى ىستەر مينيسترلىگى تيگران كەوساياندى نون گراتا جاريالانعانداردىڭ تىزىمىنە قوسقان.
مارگاريتا سيمونيان دا قازاقستانعا قاراتا ايتقان ارانداتۋ سوزدەرىمەن تانىمال بولدى. بۇعان دەيىن ول قازاقستاننىڭ دونەتسك پەن لۋگانسكتى تاۋەلسىز رەسپۋبليكا دەپ مويىندامايتىنىنا بايلانىستى ەلىمىزدى «ساتقىن» دەپ اتاپ، «جاسالعان جاقسىلىق ءۇشىن راحمەت ايتۋدى بىلمەيدى» دەگەن جازبا جاريالاعان. ال 2024 جىلى جۋرناليست قازاقستانعا «كەيبىر بۇزاقىلارمەن» كۇرەسۋ ءۇشىن رەسەي اسكەرىن جىبەرۋگە قۋانىشتى بولاتىنىن جەتكىزگەن.
