ليسسابوندا تۋريستەر اراسىندا تانىمالدىلىققا يە «گلوريا» فۋنيكۋلەرى رەلستەن شىعىپ كەتتى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
سوڭعى مالىمەتتەر بويىنشا، كەمىندە 15 ادام قازا تاۋىپ، تاعى 18 ادام جاراقات العان.
«بۇل – قايعىلى جاعداي، ليسسابون قارا جامىلىپ وتىر. بۇنداي وقيعا ءبىزدىڭ قالامىزدا بۇرىن-سوڭدى بولماعان»، – دەدى ليسسابون مەرى كارلۋش مۋەداش.
پورتۋگاليانىڭ شۇعىل مەديتسينالىق كومەك قىزمەتىنىڭ مالىمەتىنشە، زارداپ شەككەندەردىڭ بەسەۋى اۋىر حالدە اۋرۋحاناعا جەتكىزىلگەن. قالعان ون ءۇش ادام، سونىڭ ىشىندە ءبىر بالا جەڭىل جاراقات العان.
قازا تاپقانداردىڭ اراسىندا شەتەلدىكتەر دە بار، بىراق ولاردىڭ قاي ەلدىڭ ازاماتتارى ەكەنى ازىرگە ناقتىلانبادى.
جەرگىلىكتى SIC Noticias تەلەارناسىنىڭ دەرەگىنشە، اپات 3 قىركۇيەك كۇنى جەرگىلىكتى ۋاقىت بويىنشا 18:05-تە (استانا ۋاقىتى بويىنشا 23:05 – رەد.) بولعان. قايعىلى ساتتە ۆاگوندا قانشا ادام بولعانى ءالى بەلگىسىز.
