ەندى قىتايدا قازاقستاننىڭ مادەني ورتالىعى بار. بۇگىن مەملەكەت باسشىسى قاسىم-جومارت توقاەۆتىڭ رەسمي ساپارى اياسىندا اشىلۋ سالتاناتى ءوتتى.
ەندى قىتايدا قازاقستاننىڭ ءوز مادەني ورتالىعى جۇمىس ىستەيدى. بەيجىڭنىڭ قاق ورتاسىنداعى چاويان دەگەن اۋداندا ورنالاسقان. بۇل وتە قولايلى جەر. بۇل – قازاقستاننىڭ شەتەلدە اشىلعان العاشقى مادەني ورتالىعى.
جوبا قاسىم-جومارت توقاەۆ پەن سي تسزينپين ەكى ەلگە تەڭدەي مادەني ورتالىقتارىن قۇرۋ تۋرالى كەلىسىمىنىڭ ناتيجەسىندە جۇزەگە استى. بۇل كورشىلەس ەلدەر اراسىنداعى مادەنيەت پەن ونەر سالاسىنداعى ورتاق مۇددە مەن تىعىز بايلانىستى بىلدىرەدى. ورتالىقتىڭ جۇمىس جۇيەسى، ماقساتى ءبىر. ول قازاقتىڭ مادەنيەتى مەن تاريحىن، ءتىلى مەن ونەرىن، ءداستۇرىن تۇراقتى تۇردە ناسيحاتتالاتىن ورىن بولادى. ورتالىقتىڭ جالپى اۋماعى 620 شارشى مەتر. بۇل كەز كەلگەن ءىس-شارانى جوعارى دەڭگەيدە وتكىزۋگە جەتكىلىكتى. ىشىندە كىتاپحانا، كونتسەرت، ءارتۇرلى تاقىرىپتا لەكتسيالار وتكىزۋگە مۇمكىندىك بار. قازاق ءتىلى مەن مۋزىكا ۇيرەتۋ ارنايى كابينەتتەرى بار. سونىمەن قاتار ەلىمىزدىڭ تۋريستىك الەۋەتى دە وسى جەردە تانىستىرىلادى. بۇدان بولەك، كورمە زالى بولادى. وندا 100-دەن استام تاريحي-مادەني جادىگەرلەر قويىلادى. ساقتار كەزەڭى، ەسىك پەن بەرەل قورعاندارى جانە ەلىمىزدىڭ وزگە دە ايماقتارىنان تابىلعان جادىگەرلەر قويىلعان. سونداي-اق مۋزىكالىق اسپاپتار، ۇلتتىق قىز-كەلىنشەكتەردىڭ اشەكەي بۇيىمدارى، ساندىق، استاۋ، سىرماق، قۇراق كورپەشەلەر سياقتى تۇرمىستىق زاتتار كورسەتىلەدى.
- بۇل جەردە ەڭ ماڭىزدىسى، وسى ورتالىقتىڭ جۇمىسىنىڭ شەڭبەرىندە مىنا ءبىزدىڭ جاڭاعى ۇلتتىق اسپاپتارىمىزدىڭ، ەڭ باستى دومبىرامىزدىڭ، دومبىرامىزدى ۇيرەتۋگە كلاسس اشىلادى. ەكىنشىدەن، قازاق ءتىلىن ۇيرەتۋگە كلاسس اشىلادى. بۇل ەندى مەنىڭ ويىمشا، ۇلكەن مۇمكىندىك. ويتكەنى مىناۋ قىتايدا قازاق ءتىلىن ۇيرەنەم، قازاقتىڭ دومبىراسىن ۇيرەنەم دەگەندەرگە ءبىز جاڭاعى ۇلكەن مۇمكىندىكتەر بەرىپ وتىرمىز. مىنە، ءوزىڭىز كورىپ وتىرسىز، كەلىپ-كەتىپ جاتقان ادامداردىڭ بارلىعى قاشان اشىلادى، قاشان تانىسا الامىز دەپ سۇراقتارىن قويىپ جاتىر. سۇرانىس وتە جوعارى، قىزىعۋشىلىق بار. سوندىقتان مەنىڭ ويىمشا، بۇل دا بولسا ءبىزدىڭ جاڭاعى ەلىمىزدىڭ شەتەلدە مادەنيەتىنىمزدى تانىستىرۋعا، مادەنيەتىمىزدى جانداندىرۋعا ۇلكەن جول اشادى، - دەدى قر مادەنيەت جانە اقپارات ءمينيسترى ايدا بالاەۆا
