بۇگىن، 26 تامىز الماتى وبلىسى تالعار اۋدانى جاڭالىق اۋىلىنداعى ساياسي قۋعىن-سۇرگىن قۇرباندارى مۋزەيىندە “عاريفوللا انەس وقۋلارى: عالىم مۇراسى” تاقىرىبىندا عىلىمي كونفەرەنتسيا ءوتتى، دەپ حابارلايدى “ادىرنا”.
كونفەرەنتسياعا عالىمدار، جازۋشىلار، مۋزەي قىزمەتكەرلەرى جانە باق وكىلدەرى قاتىستى. ءبىر ءوزى ءبىر اكادەميانىڭ جۇمىسىن تىندىرىپ، الاش مۇراسىن قازاق حالقىنا قايتا جەتكىزۋ جولىندا تىنىمسىز ەڭبەك ەتىپ، ۇشان-تەڭىز عىلىمي، رۋحاني مۇرا قالدىرعان، قايراتكەر عالىمنىڭ عىلىمداعى جولى مەن تاۋتولاعاي ناتيجەلەرى زامانداس عالىمدار جاعىنان قيماستىقپەن ەسكە الىنىپ، ارىستارعا ساي قۇرمەتپەن اتاپ ءوتىلدى.
“ىرگەسىن ءوزى قالاپ، ەڭسەسىن تۇرعىزدىرعان مۋزەيدە بۇل شارانىڭ ءدۇبىرلى تۇردە ءوتۋىنىڭ ءجونى بولەك. شارا اياسىندا عالىمنىڭ كوزى ءتىرى كەزىندە شىعارىپ ۇلگىرمەگەن ەكى كىتابىنىڭ تۇساۋى كەسىلدى. مامىر ايىندا دا وسى كيەلى مەكەندە عالىمنىڭ بەس كىتابى وقىرمانعا جول تارتقان بولاتىن. عالىمنىڭ جۇبايى، لينگۆيست عالىم باعدان مومىنوۆا قارانارداي قايسار ازامات عاريفوللا انەس شىعارماشىلىعى، ەڭبەكقورلىعى تۋرالى قۇندى ەستەلىكتەر ايتتى.
تاعىلىمعا تولى تاعدىر كەشكەن تارلان جۇيرىكتى بارلىق قاتىسۋشىلار اسا ءبىر تولقىنىسپەن، ساعىنىشپەن ەستەرىنە الىپ، ەستەلىكتەر ءوربىتتى. احمەت بايتۇرسىنۇلى مۋزەي-ءۇيىنىڭ اتىنان جانە ءوز اتىمنان قوس عالىمنىڭ ششاكىرتى رەتىندە قاتىستىم. ءدىنتانۋشى، قولجازبا زەرتتەۋشى قۇرمانبەك قاسىمحانۇلىنىڭ سەرىك بولۋىندا اتالعان باسقوسۋعا بارىپ، جىلى لەبىز ءبىلدىرىپ، گارفوللا انەس مارقۇمعا ارناعان “تاعى كەلەمىن…!” اتتى ولەڭىمدى وقىپ بەردىم”، دەپ جازدى ادىلەت احمەت.
