Elordada «AMANAT» partiiasynyŋ «Jastar Ruhy» jastar qanaty Astana qalasy äkımdıgınıŋ qoldauymen auqymdy bos jūmys oryndary järmeŋkesın ūiymdastyrdy. Is-şaraǧa 3000-ǧa juyq adam qatysty.
Bügınde myŋdaǧan qazaqstandyq jastar jūmys ızdep jür. Al eger jūmysty bır künde – elordanyŋ däl ortalyǧynda, elımızdıŋ ondaǧan ırı jūmys beruşılerınıŋ arasynan tabuǧa bolatyn bolsa şe? Astanada däl osylai boldy. E. Rahmadiev atyndaǧy memlekettık akademiialyq filarmoniia bır künge mektep, kolledj jäne joǧary oqu oryn tülekterıne arnalǧan auqymdy bos jūmys oryndary järmeŋkesı aiasynda studentterdı, tülekterdı jäne jūmys beruşılerdı bırıktıretın ırı mansap alaŋyna ainaldy. Jastar ūlttyq kompaniialardan bastap, önerkäsıptık käsıporyndarǧa deiıngı 70-ten astam kompaniianyŋ ökılderımen betpe-bet söilestı. Olar jūmysqa ornalasu mümkındıgı turaly bılıp, alǧaşqy sūhbattan öttı.
«AMANAT» partiiasynyŋ Atqaruşy hatşysy Däulet Kärıbek Memleket basşysy Qasym-Jomart Toqaev jariialaǧan Jūmysşy mamandyqtary jyly osyndai ıs-şaralar ūiymdastyrudyŋ mänı men maŋyzyn atap öttı. Būl şeşım qoǧam igılıgı jolynda adal jūmys ıstep jürgen jandardy qoldauǧa arnalǧan.
«Bügınde jūmysşy mamandyqtar – tūraqtylyq pen joǧary sūranys qana emes, sonymen qatar laiyqty jalaqy, syi-qūrmet jäne mansap jolynda joǧarylau mümkındıgı. Jastar ekonomikanyŋ osy sektoryna bet būryp, el erteŋı eŋbekpen bailanysty ekenın tüsıne bastady. Būl – öte maŋyzdy. Bızdıŋ bos jūmys oryndary järmeŋkelerımız jastarǧa ömırde öz ornyn, al jūmys beruşılerge laiyqty maman tabuyna kömektesedı. Jas azamattar üşın tek jūmys tabu ǧana emes, sonymen qatar olardyŋ eŋbegı baǧalanatynyn, ösu men damu mümkındıgı bar ekenın sezınu maŋyzdy. Sondyqtan «AMANAT» partiiasy är tülek ömırde öz ornyn tauyp, mansap jolyn bastai alatyn bastamalardy jüzege asyruda», – dedı ol.
Astanadan bölek, «Jastar Ruhynyŋ» bastamasymen elımızdıŋ barlyq oblys ortalyǧynda osyndai järmeŋkeler ötude. Olarǧa kem degende 50 myŋ qazaqstandyq jas azamat keledı dep josparlanuda. Bos jūmys oryndary järmeŋkelerı «bır tereze» qaǧidaty boiynşa ötude: jūmys ızdep jürgen jastar kompaniialardyŋ ūsynystarymen tanysyp qana qoimai, jastarǧa qoldau körsetudıŋ memlekettık baǧdarlamalary boiynşa anyqtama ala alady. Sonyŋ ışınde, jastar praktikasynan bastap, oqytu jäne öz ısın aşuǧa deiıngı qoldaular bar.
«Men kolledjdı «elektromonter» mamandyǧy boiynşa tämamdap, ūzaq uaqyt laiyqty jūmys ızdedım. Bügın osy järmeŋkede bırneşe kompaniia ökılımen söilesıp, sūhbatqa şaqyru aldym. Būl – eŋbek etuge yntalandyrady. Sebebı naqty mümkındıkterdı körıp otyrmyn. Jūmys beruşı sızdı taŋdamaidy, kerısınşe sız bos jūmys oryndarynyŋ arasynan özıŋızge qolailysyn taŋdaisyz», – dedı järmeŋkege qatysqan Aidar Kenjebaev.
Sondai-aq järmeŋke aiasynda «Otbasy bank» ökılderı ipoteka resımdeuge niettı azamattarǧa keŋes berıp, Astana qalasy äkımdıgınıŋ ökılderı NEET sanatyndaǧy jastardy jūmyspen qamtuǧa järdemdesu boiynşa «Joltap» jobasyn ūsyndy. Al elordadaǧy Eŋbek ūtqyrlyǧy ortalyǧynyŋ qyzmetkerlerı tülekterge arnalǧan «Alǧaşqy jūmys orny» jäne «Jastar praktikasy» jobalary turaly habardar ettı. Sonymen qatar järmeŋkege kelgen azamattarǧa elımızdıŋ özge öŋırlerıne köşıp baru mümkındıgı turaly mälımet ūsynyldy.
«Ertıs öŋırı – önerkäsıp aimaǧy. Bızde bos jūmys oryndary öte köp. Juyrda Astana qalasy da halyq arasynda «oŋtüstıkten soltüstıkke» dep atalatyn erıktı türde qonys audaru baǧdarlamasyna şyǧu öŋırı retınde endı. Osy baǧdarlama şeŋberınde mındettı türde memlekettık qoldau şaralary qarastyrylǧan. Mäselen – köşuge arnalǧan subsidiia. Köşıp barǧan otbasynyŋ är müşesıne jyl boiy tūrǧyn üi jaldau ötemaqysy tölenedı. Būǧan qosa, ekonomikalyq ūtqyrlyq sertifikaty berıledı. Iаǧni, tūrǧyn üi satyp alu kezınde memleket baspana qūnynyŋ 50%-yn jabady», – dedı Pavlodar oblysyndaǧy Eŋbek ūtqyrlyǧy ortalyǧy direktorynyŋ orynbasary Qazbek Jomartov.
Sondai-aq järmeŋkede «Taza Qazaqstan» arnaiy orny jūmys ıstedı. Onda qaita öŋdeu maqsatynda plastik jinalyp, jasyl tehnologiialar turaly mälımet berıldı. Mūndai oryn – el erteŋıne degen qamqorlyq tek jastardy jūmyspen qamtu ǧana emes, sonymen qatar ekologiialyq mädeniettı qalyptastyru ekenın körsettı.
«AMANAT» partiiasy Eŋbek jäne halyqty äleumettık qorǧau ministrlıgımen bırlesıp jüzege asyryp jatqan «Jastarǧa jūmys» jobasy öz tiımdılıgın däleldedı. Mäselen, keiıngı ekı jylda 150 myŋǧa juyq jas azamat qamtylǧan 1,5 myŋnan astam ıs-şara ötkızıldı. 200-ge juyq bos jūmys oryndary järmeŋkesı ūiymdastyryldy, oǧan 5,2 myŋnan astam ūiym qatysty, 55 myŋnan astam jas azamat jūmysqa ornalastyryldy. Şalǧaidaǧy eldı mekenderdı qamtu maqsatynda «Jastar Ruhynyŋ» mobildı toptary 150-den astam auylǧa baryp, 55 myŋ adamǧa äleumettık-eŋbek mäselelerı boiynşa keŋes berdı.
Osylaişa, «AMANAT» partiiasynyŋ bastamasy Memleket basşysy öz sailaualdy baǧdarlamasynda alǧa qoiǧan strategiialyq maqsatty jüzege asyrudyŋ bır bölıgıne ainaluda: 2029 jylǧa qarai kemınde 2,3 mln jas azamatty jūmyspen qamtu.
