تۇركىمەنستاندا قازاقستاننان تاسىلعان مۇزداتىلعان ەت پارتيالارىنان برۋتسەلليوز تابىلعانى ايتىلدى، دەپ حابارلايد "ادىرنا" ۇلتتىق پورتالى تۇركىمەنستان حرونيكاسى باسىلىمىنا سىلتەمە جاساپ.
باسىلىم دەرەگىنشە، اقمولا وبلىسىنان تۇركىمەنستانعا مۇزداتىلعان ەت جەتكىزىلگەن. كەيىن سانيتارلىق-ەپيدەميولوگيالىق ساراپتاما جۇرگىزگەن زەرتحانا سىنامالاردان برۋتسەلليوز انىقتالعان. قازاقستان تاراپى بۇل جاعداي جونىندە تۇركىمەن ارىپتەستەرىنە رەسمي تۇردە حابارلاپ، يمپورتتاۋشى كومپانيانىڭ تولەنگەن قارجىنى تولىق قايتاراتىنىن مالىمدەگەن.
العاشقى پارتيا احال ءۋالاياتىنا جەتكىزىلىپ، مەكتەپكە دەيىنگى بالالار مەكەمەلەرى مەن بالالار ۇيلەرىنە بولىنگەن. ەكىنشى پارتيا مارى جانە لەباپ ۋالاياتتارىنداعى تۇتىنۋشىلار قوعامىنىڭ ساۋدا ورىندارى ارقىلى ساتىلعان. بارلىق ەت تاعام رەتىندە پايدالانىلىپ قويعان.
تۇركىمەنستاننىڭ دەنساۋلىق ساقتاۋ جانە مەديتسينالىق ونەركاسىپ مينيسترلىگى بۇل اقپاراتتى قۇپيا ۇستاپ، ينفەكتسيالىق اۋرۋحانالاردىڭ بولىمشەلەرىن تەكسەرۋدى جانە قاجەت بولعان جاعدايدا ناۋقاستاردى وقشاۋلاۋدى تاپسىرعان.
