تۇركىمەنستان بالاباقشالاردا تۇرىك مۋلتفيلمدەرى مەن باعدارلامالارىن كورسەتۋگە تىيىم سالدى. باستى سەبەپ، بالالاردىڭ تۇرىك تىلىندە سويلەپ كەتۋى بولىپ وتىر.
اقپان ايىنداعى تەكسەرىس كەزىندە، تۇركىمەنستاننىڭ فاراپ، سايات جانە باسقا اتىراپتارىندا بالاباقشا قىزمەتكەرلەرى بالالارعا تۇرىك تىلىندەگى مۋلتفيلمدەر مەن باعدارلامالاردى كورسەتەتىنى انىقتالعان. تۇركىمەن جانە تۇرىك تىلدەرى ۇقساس بولعاندىقتان، كوپتەگەن بالالار تۇرىك سوزدەرىن قولدانا باستاعان.
تەكسەرىس سوڭىندا مەكتەپكە دەيىنگى مەكەمەلەردە تۇرىك تىلىندەگى ارنالاردى كورسەتۋگە تىيىم سالىندى. تاپسىرمانىڭ ورىندالۋىن ارنايى كوميسسيا اپتاسىنا 3 مارتە قاداعالاپ، تەكسەرىپ تۇرادى.
ەگەر تۇرىك تىلىندەگى ارنا قوسۋلى بولسا، وندا بالاباقشا قىزمەتكەرى، باسشىسى جۇمىستان شىعارىلۋى مۇمكىن.
اسحات قاسەنعالي،
«ادىرنا» ۇلتتىق پورتالى
