پرەزيدەنت قاسىم-جومارت توقاەۆتىڭ توراعالىعىمەن قاۋىپسىزدىك كەڭەسىنىڭ ناركوتيزمگە قارسى ءىس-قيمىل ماسەلەلەرى جونىندەگى وتىرىسى ءوتتى. بۇل تۋرالى بۇگىن، 13 تامىزدا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ ايتۋىنشا، بۇل الەۋمەتتىك كەسەلدىڭ بەلەڭ الۋىنا قاتىستى احۋال ەلىمىزدە دە، حالىقارالىق اۋقىمدا دا الاڭداتارلىق جاعدايعا جەتتى.
«ناركوتيزم – زاماننىڭ دەرتى، قوعام ءۇشىن اسا قاۋىپتى. ول جاستاردىڭ بولاشاعىنا بالتا شابادى. ۇلت ساۋلىعىنا قاتەر توندىرەدى. ناشاقورلىق پەن ەسىرتكى بيزنەسىندەگى الەمدىك ءۇردىس الاڭداتارلىق سيپاتقا يە بولدى. كوپتەگەن ەلدىڭ ۇكىمەتتەرى اتالعان پروبلەمانى فيزيكالىق جانە پسيحيكالىق تاۋەلدىلىك قانا ەمەس، اۋقىمدى قوعامدىق، ەكونوميكالىق جانە قۇقىقتىق قۇبىلىس رەتىندە قاراستىرا باستادى. ناركوتيزم تەرمينى مۇنداي ءتاسىلدىڭ ءمان-ماعىناسىن اشادى»،— دەدى قاسىم-جومارت توقاەۆ.
پرەزيدەنت ەسىرتكىگە تاۋەلدىلەر ەمدەۋ-ساۋىقتىرۋ شارالارىمەن جەتكىلىكتى دەڭگەيدە قامتىلماي وتىرعانىنا نازار اۋدارىپ، ماسەلەنى شەشۋ قاجەت ەكەنىن مالىمدەدى.
«ەسىرتكىگە تاۋەلدى جانداردىڭ كوپشىلىگى مەن ولاردىڭ جاقىندارى جاريالىلىقتان جانە جۇرتشىلىقتىڭ تالقىلاۋىنان قاۋىپتەنىپ، پروبلەماسىن جاسىرادى»،— دەدى ول.
بۇل رەتتە مەملەكەتتىك ساياساتتىڭ ناشاقورلارعا كەڭشىلىك تانىتىپ، ال ەسىرتكى ساۋداسىنا كەلگەندە قاتاڭ جانە مۇلدە توزبەۋشىلىك ۇستانىمدا بولۋعا ءتيىس ەكەنى ايتىلدى.
سونداي-اق توقاەۆ ناشاقورلىقتىڭ الدىن الۋ شارالارىن كۇشەيتۋدى، اسىرەسە، ءبىلىم بەرۋ مەن اقپارات سالاسىندا كەڭىنەن جۇمىس جۇرگىزۋدى تاپسىردى.
«كەز كەلگەن ەسىرتكى ءتۇرىنىڭ ءوندىرىسى مەن ساتىلىمىنا قاتاڭ تىيىم سالىنىپ، مەملەكەتتىڭ ءجىتى باقىلاۋىندا بولۋى كەرەك»،– دەدى پرەزيدەنت.
قاسىم-جومارت توقاەۆ ترانسۇلتتىق ۇيىمداسقان قىلمىسقا قارسى ءىس-قيمىلدى، سونداي-اق ەسىرتكى ساتاتىن ورىندار مەن زەرتحانالاردىڭ يەلەرىن اشكەرەلەۋ جۇمىستارىن كۇشەيتۋ قاجەتتىگىن ايتتى.
جيىن سوڭىندا پرەزيدەنت ناركوتيزمگە قارسى كۇرەسكە قوعام بولىپ جۇمىلۋدىڭ ماڭىزدى ەكەنىن اتاپ ءوتتى. سونداي-اق ۇكىمەتكە، ءوڭىر اكىمدەرىنە جانە جاۋاپتى مەملەكەتتىك ورگاندارعا ناشاقورلىقتان ساقتاندىرۋ جانە ەسىرتكى بيزنەسىنە قارسى كۇرەس شارالارىن كۇشەيتۋ جونىندە بىرقاتار ناقتى تاپسىرما بەردى.
