قورعانىس مينيسترلىگى تىكۇشاق اپاتىنان قازا تاپقان ءۇش اسكەري قىزمەتكەردىڭ ەسىمدەرى مەن فوتولارىن جاريالادى. سۋ استىنداعى ىزدەستىرۋ جۇمىستارى بارىسىندا قازا تاپقان ءۇشىنشى اسكەري قىزمەتكەردىڭ دە دەنەسى تابىلدى, دەپ حابارلايدى “ادىرنا”.
10 تامىزدا ىزدەۋ توبى ەكيپاج كومانديرى – مايور نۇرجىگىت ۇيسىنباەۆتىڭ ءمايىتىن انىقتادى. ول ارميالىق اۆياتسيادا (ۆير) ەسكادريليا كومانديرىنىڭ ورىنباسارى قىزمەتىن اتقارعان، 1-سىنىپتى ۇشقىش بولعان. EC-145 تىكۇشاعىن باسقارۋدا مول تاجىريبەسى بار مايوردىڭ جالپى ۇشۋ ۋاقىتى 930 ساعاتتى قۇراعان.
11 تامىزدا بورت تەحنيگى – كاپيتان باحتيار ەرجىگىتوۆتىڭ دەنەسى تابىلدى. اۆياتسيالىق ەسكادريليا قۇرامىندا قىزمەت ەتكەن ول 1-سىنىپتى مامان رەتىندە EC-145 تىكۇشاعىن پايدالانۋدا 300 ساعات تاجىريبە جيناعان.
12 تامىزدا ەكيپاج كومانديرىنىڭ كومەكشىسى – كاپيتان امان امانگەلدىنىڭ ءمايىتى تابىلدى. ول – كۇردەلى مەتەورولوگيالىق جاعدايدا دا ۇشۋ تاجىريبەسى بار، بىرنەشە وقۋ-جاتتىعۋ مەن اسكەري وپەراتسياعا قاتىسقان كاسىبي ۇشقىش. ونىڭ جالپى ۇشۋ ۋاقىتى 295 ساعاتتى قۇراعان.
ۇشەۋى دە قازاقستان رەسپۋبليكاسى قارۋلى كۇشتەرىنىڭ اۋە قورعانىسى كۇشتەرى اسكەري ينستيتۋتىنىڭ تۇلەكتەرى.
قازىرگى ۋاقىتتا اپات بولعان جەردەگى ىزدەستىرۋ-قۇتقارۋ جۇمىستارى جالعاسۋدا. تىكۇشاقتىڭ فراگمەنتتەرىن تابۋ جانە سۋ تۇبىنەن كوتەرۋ شارالارى جۇرگىزىلۋدە. سونىمەن قاتار، اپاتتىڭ ناقتى سەبەپتەرىن انىقتاۋ ماقساتىندا تەرگەۋ امالدارى جۇرگىزىلىپ جاتىر.
ەسكە سالايىق، اپاتقا ۇشىراعان تىكۇشاق – EC-145 ۇلگىسىندەگى ارميالىق اۆياتسياعا تيەسىلى تىكۇشاق. قايعىلى وقيعانىڭ ناقتى كۇنى مەن ءمان-جايى رەسمي تۇردە ءالى حابارلانعان جوق.
