Qazaqstan Prezidentı Qasym-Jomart Toqaev Abai Qūnanbaiūlynyŋ tuǧanyna 180 jyl toluyna arnalǧan saltanatty ıs-şara qatysuşylaryna qūttyqtau sözın joldady.
Memleket basşysy Abaidy «töl mädenietımızdı damytuǧa ölşeusız üles qosqan älemdık deŋgeidegı kemeŋger tūlǧa» dep atap, onyŋ şyǧarmaşylyǧy halqymyzdyŋ sana-sezımın jaŋǧyrtyp, ūlttyq ruhty asqaqtatqanyn aitty.
Prezidenttıŋ aituynşa, Abaidyŋ öleŋderı men qara sözderı öskeleŋ ūrpaqty bılımpazdyqqa, eŋbekqorlyqqa, adaldyqqa ündep, el müddesı üşın qyzmet etudıŋ ülgısın körsetedı.
«Abaidyŋ mol mūrasy – qazaq halqynyŋ ǧana emes, barşa adamzattyŋ asyl qazynasy. Onyŋ ösietterı eşqaşan özektılıgın joǧaltpaidy», – dedı Toqaev.
Sondai-aq ol Abai tuǧan öŋırdıŋ Şäkärım Qūdaiberdıūly, Mūhtar Äuezov sekıldı ūly tūlǧalarmen bırge ūlttyq qūndylyqtardyŋ ortalyǧy ekenın atap öttı. Memleket būl aimaqty damytuǧa erekşe män beretının jetkızdı.
Qasym-Jomart Toqaev qūttyqtauyn «Ūly Abaidyŋ amanatyna adal bolaiyq!» degen sözben tüiındedı.
