بۇگىن، 5 تامىز كۇنى اقتاۋ قالاسىندا وبلىس اكىمى نۇرداۋلەت قيلىبايدىڭ قاتىسۋىمەن «قحا 30 جىل: بىرلىك پەن كەلىسىم» اتتى قازاقستان حالقى اسسامبلەياسى ەتنومەدياتورلارىنىڭ رەسپۋبليكالىق فورۋمى ءوتتى.
اۋقىمدى ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – قر پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ سونداي-اق، رەسپۋبليكالىق جانە وڭىرلىك ەتنومەدياتسيا ورتالىقتارىنىڭ جەتەكشىلەرى، ەلىمىزدىڭ ءار وڭىرىنەن كەلگەن دەلەگاتتار، ەتنومەدياتورلار، اقساقالدار مەن انالار كەڭەسىنىڭ مۇشەلەرى، ۇكىمەتتىك ەمەس ۇيىم وكىلدەرى مەن ءماسليحات دەپۋتاتتارى، جەرگىلىكتى مەملەكەتتىك ورگان وكىلدەرى قاتىستى.
اۋقىمدى شارا پرەزيدەنت قاسىم-جومارت توقاەۆتىڭ: «قازاقستان رەسپۋبليكاسىنىڭ مادەنيەت جانە اقپارات، ىشكى ىستەر، ادىلەت مينيسترلىكتەرى مۇددەلى مەملەكەتتىك ورگاندارمەن، استانا، الماتى، شىمكەنت قالالارىنىڭ جانە وبلىستاردىڭ اكىمدەرىمەن بىرلەسىپ، قازاقستان حالقى اسسامبلەياسىنىڭ ەتنومەدياتسيا سالاسىنداعى جۇمىسىنا جان-جاقتى قولداۋ كورسەتسىن، «ەلدەسۋ جانە تاتۋلاسۋ» جوباسىنىڭ اۋقىمىن كەڭەيتسىن»،-دەگەن تاپسىرماسى اياسىندا ءوتتى.
فورۋم بارىسىندا ەتنومەدياتسيا سالاسىنداعى بىرقاتار ماڭىزدى تاقىرىپتار تالقىلاندى. اتاپ ايتقاندا، وڭىرلەردەگى ەتنومەدياتسيا ينستيتۋتىنىڭ دامۋ تاجىريبەسى، ەتنوسارالىق قاتىناستاردى رەتتەۋدەگى ءتيىمدى ادىستەر مەن پراكتيكالىق كەيستەر، ەتنومەدياتورلاردىڭ كاسىبي دايارلىعى مەن وقىتۋ باعدارلامالارىنىڭ ءرولى ءسوز بولدى. 
سونىمەن قاتار، قاتىسۋشىلار ەتنوسارالىق جانجالداردىڭ الدىن الۋ الگوريتمدەرى، قوعاممەن كونسترۋكتيۆتى ءوزارا ءىس-قيمىل جاساۋ جولدارى، حالىقارالىق تاجىريبەلەر جانە ەلىمىزدە مەدياتسيانى دامىتۋعا ارنالعان نەگىزگى تاسىلدەر بويىنشا پىكىر الماستى.
جيىن بارىسىندا وبلىس اكىمى نۇرداۋلەت قيلىباي ەلدىڭ دامۋى مەن قوعامنىڭ دۇرىس باعىتتا ىلگەرىلەۋى اۋىزبىرشىلىك پەن بىرلىك بولعان جاعدايدا عانا مۇمكىن ەكەنىن اتاپ ءوتتى.
- مەملەكەت باسشىسى قاسىم-جومارت توقاەۆتىڭ بۇۇ باس حاتشىسى انتونيۋ گۋتەرريشپەن كەزدەسۋىندە باس حاتشى قازاقستانداعى ەتنوسارالىق تاتۋلىق پەن قوعامدىق اۋىزبىرشىلىككە جوعارى باعا بەرىپ كەتتى. ءبىز ءبىر-بىرىمىزگە قولداۋ كورسەتىپ، ورتاق ماقساتقا جۇمىلساق قانا ءوڭىرىمىزدىڭ، ەلىمىزدىڭ الەۋەتىن ارتتىرا الامىز. اۋىزبىرشىلىك پەن ءوزارا تۇسىنىستىك بار جەردە عانا ناتيجە دە، دامۋ دا بولادى. سوندىقتان ىنتىماعىمىزدى بەكەمدەپ، ونى بارىنشا دامىتۋىمىز كەرەك،” – دەدى ءوڭىر باسشىسى.
فورۋمنىڭ سوڭىندا بىرقاتار ازاماتتار قازاقستان حالقى اسسامبلەياسىنىڭ ارنايى ماراپاتتارىنا يە بولدى. ەتنوسارالىق تاتۋلىق پەن قوعامدىق كەلىسىمدى نىعايتۋعا قوسقان ۇلەسى ءۇشىن قاتىسۋشىلارعا «العىس» مەدالى مەن مەرەكەلىك العىس حاتتار تابىستالدى.
