قازاقستان رەسپۋبليكاسىنىڭ قورعانىس مينيسترلىگىنە تيەسىلى تىكۇشاقتى ىزدەستىرۋگە الماتى وبلىسىنداعى يونوسفەرا ينستيتۋتىنىڭ جانە «گەوكۋرس» كومپانياسىنىڭ عالىمدارى تارتىلۋدا، دەپ حابارلايدى "ادىرنا".
ەستەرىڭىزگە سالا كەتەيىك، اسكەري EC-145 تىكۇشاق 25 شىلدەدە لۋگوۆوي اۋەجايىنان ۇشىپ شىعىپ، رادارلاردان جوعالعان بولاتىن. ونىڭ بورتىنا ءۇش ەكيپاج مۇشەسى وتىرعان. ىزدەۋ جۇمىستارى سوربۇلاق سۋ قويماسىندا باستالدى، وندا تجم تىكۇشاقتىڭ العاشقى بولىكتەرىن تاپقان.
“ىزدەۋ جۇمىستارىنا يونوسفەرا ينستيتۋتىنىڭ جانە «گەوكۋرس» كومپانياسىنىڭ ءتورت مامانى قوسىلدى”، دەپ حابارلادى قورعانىس مينيسترلىگىنەن.
ۆەدومستۆانىڭ ىزدەستىرۋ-قۇتقارۋ جۇمىستارى تۋرالى پرەسس-رەليزىندە «سۋدىڭ استىنداعى جانە جەردەگى ىزدەۋ جۇمىستارىن جۇرگىزەتىن ارنايى جابدىقتاردى قولداناتىن عىلىمي جانە تەحنيكالىق ۇيىمدار تارتىلعانى» كورسەتىلگەن. سونىمەن قاتار، ۇشۋ قيىن ايماقتارىن اۋەدەن تەكسەرۋ، جاعالاۋ ايماعىن جانە كولدىڭ سۋ ايدىنىن زەرتتەۋ جۇمىستارى جۇرگىزىلۋدە.
«قورعانىس ءمينيسترى گەنەرال-لەيتەنانت اۆياتسيا داۋرەن كوسانوۆتىڭ تاپسىرماسىمەن ارنايى كوميسسيا قۇرىلدى. وعان مەملەكەتتىك اۆياتسيانىڭ ۇشۋلار قاۋىپسىزدىگى دەپارتامەنتىنىڭ جوعارى بىلىكتى ماماندارى كىردى. كوميسسيانىڭ ءبىر بولىگى ىزدەۋ جۇمىستارىمەن اينالىسسا، ەكىنشى بولىگى اۆياتسيالىق وقيعانى تەرگەۋ شارالارىن جۇرگىزۋدە»، – دەپ اتاپ ءوتتى پرەسس-رەليزدە.
ارنايى كوميسسيا تىكۇشاقتىڭ دايىندىق جانە پايدالانۋ قۇجاتتارىن، قۇقىق قورعاۋ ورگاندارى مەن اۆياتسيالىق قىزمەتتەردەن الىنعان مالىمەتتەردى، مەتەورولوگيالىق جانە ورنيتولوگيالىق جاعدايدى، سونداي-اق باسقا دا فاكتورلاردى زەرتتەپ جاتىر، دەپ ايتتى قر اۋە قورعانىسى كۇشتەرىنىڭ قولباسشىسى گەنەرال-مايور اسكار يزباسوۆ.
ىزدەۋ-قۇتقارۋ جۇمىستارى 11 كۇننەن بەرى جالعاسىپ جاتىر. قورعانىس مينيسترلىگىنىڭ مالىمەتىنشە، ولاردى جۇرگىزۋگە 330-دان استام ادام، 59 بىرلىك اۆتوكولىك، 23 ءجۇزۋ قۇرالى، 12 ۇشقىشسىز ۇشۋ اپپاراتى، سونداي-اق ەحولوتتار، گەورادارلار، اۆياتسيا جانە كينولوگيالىق توپتار تارتىلعان. سونىمەن قاتار، ىزدەۋ جۇمىستارىنا قورعانىس مينيسترلىگىنىڭ ماماندارىمەن قاتار تجم، ءىىم جانە باسقا دا مەملەكەتتىك قۇرىلىمداردىڭ قىزمەتكەرلەرى قاتىسۋدا.
اۋا رايىنىڭ كۇردەلىلىگى – ءتۇبىنىڭ كوپ تۇنبالى بولۋى، سۋدا كورىنىستىڭ نولدىك دەڭگەيدە بولۋى جانە اۋا رايىنىڭ وزگەرمەلىلىگىنە قاراماستان، جۇمىستار تاۋلىك بويى جۇرگىزىلۋدە.
قورعانىس مينيسترلىگىندە ىزدەۋلەر ەكيپاج مۇشەلەرىنىڭ تاعدىرى انىقتالعانشا جانە اپاتتىڭ سەبەپتەرى انىقتالعانشا جالعاساتىنىن اتاپ ءوتتى.
