الماتى قالاسى قوعامدىق دامۋ باسقارماسىنىڭ ۇيىمداستىرۋىمەن قازاقستان رەسپۋبليكاسى كونستيتۋتسياسىنىڭ 30 جىلدىعىنا ارنالعان «ىقپالدى پارلامەنت: ازاماتتاردىڭ كونستيتۋتسيالىق قۇقىقتارى» اتتى دوڭگەلەك ۇستەل ءوتتى.
ءىس-شاراعا ءماسليحات دەپۋتاتتارى، قوعام قايراتكەرلەرى، قۇقىقتانۋشىلار، ساراپشىلار مەن بەلسەندى جاستار قاتىستى.
جيىن بارىسىندا ەلىمىزدىڭ دامۋ جولىنداعى جەتىستىكتەر مەن وزگەرىستەرگە نەگىز بولعان اتا زاڭنىڭ ءرولى، قۇقىقتىق مەملەكەتتى قالىپتاستىرۋداعى ماڭىزدىلىعى، زاڭ ۇستەمدىگى، ازاماتتاردىڭ قۇقىقتارى مەن بوستاندىقتارىنىڭ ساقتالۋى جانە جاستاردىڭ قۇقىقتىق ساۋاتتىلىعىن ارتتىرۋ ماسەلەلەرى كەڭىنەن تالقىلاندى.
مەديتسينا عىلىمدارىنىڭ دوكتورى زاۋرەش امانجولوۆا جيىن بارىسىندا كونستيتۋتسيانىڭ دامۋىنا توقتالىپ، ءوز پىكىرىن ءبىلدىردى:
«30 جىلدا ارينە كوپ ىستەر اتقارىلدى. كونستيتۋتسياعا قانشاما وزگەرىستەر ەنگىزىلدى. ارينە، «كوش جۇرە تەڭەلەدى» دەيدى حالقىمىز. ادام بالاسى وسى ءبىز قالىپتاسىپ كەلە جاتقان كەزدە قانداي ءبىر ەرەكشەلىكتەر كەرەك، قانداي ءبىر وزگەرىستەر كەرەك سونى كونستيتۋتسياعا ەنگىزۋ ول ارينە پارلامەنت ارقىلى جاسالىناتىن نارسە».
الماتى قالالىق قوعامدىق دامۋ باسقارماسىنىڭ باسشىسى
ايدار ەسەنبەكوۆ اتا زاڭنىڭ ەل دامۋىنا قوسقان ۇلەسىنە نازار اۋداردى:
«اتا زاڭىمىزدىڭ ارقاسىندا ءبىز تۇراقتى دامۋعا قول جەتكىزدىك. ازاماتتاردىڭ الەۋمەتتىك-ەكونوميكالىق جەتىستىكتەرى، قۇقىقتارى مەن بوستاندىقتارىنىڭ ساقتالۋى — وسى كونستيتۋتسيانىڭ نەگىزىندە جۇزەگە اسىرىلۋدا. سوندىقتان، كونستيتۋتسيانىڭ ءمانى ءبىز ءۇشىن وتە زور».
پروفەسسور، حالىقارالىق ينفورماتيزاتسيا اكادەمياسىنىڭ اكادەميگى، جوبالاردى باسقارۋ ينستيتۋتىنىڭ مۇشەسى الەكسەي تسەحوۆوي ەلىمىزدىڭ تاريحي جولىنا توقتالىپ، ويىمەن ءبولىستى:
«كەڭەس وداعىنىڭ كۇيرەۋى سەكىلدى اسا كۇردەلى ساياسي ۇدەرىستى قازاقستان باسقا رەسپۋبليكالارعا قاراعاندا الدەقايدا جەڭىل وتكەردى. ءبىز مەملەكەتتىك ەگەمەندىگىمىزدى ساقتاپ، نىعايتتىق، كونستيتۋتسيا ارقىلى ءوزىمىزدىڭ قازاقستان حالقى ەكەنىمىزدى، ياعني ەتنوستاردىڭ جيىنتىعى ەمەس، ءبىرتۇتاس حالىق ەكەنىمىزدى سانالى تۇردە تۇسىندىك».
سونىمەن قاتار، قازاقستان رەسپۋبليكاسى كونستيتۋتسياسىنىڭ 30 جىلدىعىنا وراي الماتى قالاسىندا وتكىزىلەتىن ءىس-شارالار قاتىسۋشىلارعا جەتكىزىلدى.
