الماتى قالاسى جاستار ساياساتى باسقارماسى قولداۋىمەن، «Human Resources Kazkhstan» جەكە مەكەمەسىنىڭ ۇيىمداستىرۋىمەن ناۋرىزباي اۋدانىنىڭ دەمالىس ورتالىقتارى تاربيەلەنۋشىلەرى شارىن شاتقالىنا ەكسكۋرسيا جاسادى.
19 شىلدە كۇنى الماتى قالاسى جاستار ساياساتى باسقارماسىنىڭ قولداۋىمەن ناۋرىزباي اۋدانىنىڭ دەمالىس ورتالىقتارىندا ءبىلىم الىپ جاتقان بالالار ءۇشىن شارىن شاتقالىنا تانىمدىق باعىتتاعى ەكسكۋرسيا ۇيىمداستىرىلدى.
ساپارعا 50 بالا جانە جەتەكشىلەرى قاتىسىپ، ەلىمىزدىڭ بىرەگەي تابيعي ەسكەرتكىشى — شارىن شاتقالىنىڭ تاريحي-گەوگرافيالىق ەرەكشەلىكتەرىمەن تانىستى. بالالار شاتقالدىڭ اسەم تابيعاتىن تاماشالاپ، ەكولوگيالىق مادەنيەتكە بايلانىستى تىڭ اقپاراتتار الىپ، بەلسەندى سەرۋەن وتكىزدى.
ءىس-شارانىڭ ماقساتى — بالالار مەن جاسوسپىرىمدەرگە تابيعاتتى ايالاۋ، تۋعان ولكەنى ءسۇيۋ، تاريحي جەرلەردى تانۋ باعىتىندا تاربيە بەرۋ، سونىمەن قاتار، ولاردىڭ جازعى دەمالىسىن مازمۇندى ءارى قاۋىپسىز ۇيىمداستىرۋ.
