اقبوكەندەردىڭ سانىن رەتتەۋ جۇمىستارىن «وحوتزووپروم» رمك قىزمەتكەرلەرى جۇزەگە اسىرادى. اقبوكەننىڭ سويىلعان ۇشالارى رەفريجەراتورلارعا سالىنىپ، سويۋ پۋنكتتەرىنە جەتكىزىلەدى.
جانۋارلاردىڭ اسا قاۋىپتى اۋرۋلارىن (ۇساق كۇيىس قايىراتىن جانۋارلاردىڭ وباسى، اۋسىل، برۋتسەللەز، پاستەرەللەز، ءسىبىر جاراسى جانە تاعى باسقا) بولدىرماۋ ماقساتىندا اقبوكەندەردىڭ بۇكىل پوپۋلياتسياسىنا ۇلتتىق ۆەتەريناريا رەفەرەنتتىك ورتالىعى تۇراقتى تۇردە ەپيزووتيالىق مونيتورينگ جۇرگىزەدى.
سونىمەن قاتار، اقبوكەندەرمەن ورتاق جايىلىمدار مەن سۋاتتاردا اۋىل شارۋاشىلىعى جانۋارلارىنا دا ۆەتەريناريالىق قىزمەت تۇراقتى تۇردە مونيتورينگتىك زەرتتەۋلەر جۇرگىزىپ وتىرادى.
ايتا كەتۋ كەرەك، اقبوكەندەردى سويۋ جانە بيولوگيالىق قالدىقتاردى زالالسىزداندىرۋ بويىنشا ءتيىستى نورماتيۆتەر قابىلدانعان. 2023 جىلعى 27 قاراشادا قر ست «سايعاق ەتى بۇقتىرىلعان. تەحنيكالىق شارتتار» جانە قر ست «سايعاق ەتى – تۇتاس جانە جارتىلاي ۇشالار. جالپى تەحنيكالىق شارتتار» ۇلتتىق ستاندارتتارى بەكىتىلگەن.
قازىرگى ۋاقىتتا اقبوكەندەردىڭ سانىن رەتتەۋ جۇمىستارىنا 6 وبلىستاعى 24 سويۋ پۋنكتى جۇمىلدىرىلعان. بارلىق سويۋ وبەكتىلەرى ۆەتەريناريالىق-سانيتاريالىق تالاپتارعا ساي (مال سويۋعا ارنالعان ارنايى بولمەلەر، توڭازىتقىش كامەرالار، ۇشالاردى ىلۋگە ارنالعان قۇرالدار، سۋمەن جابدىقتاۋ جانە ت.ب.).
ۇشالار سويۋ ورىندارىنا جەتكىزىلگەن سوڭ، ولار ۆەتەريناريالىق دارىگەرلەردىڭ باقىلاۋىنان ءوتىپ، ۆەتەريناريالىق-سانيتاريالىق ساراپتامادان وتكىزىلەدى.
بۇل رەتتە، اقبوكەن ەتىنە مىندەتتى زەرتتەۋلەر جۇرگىزىلەدى، ولار: ۇشانىڭ، ىشكى اعزالاردىڭ جانە باسىنىڭ ورگانولەپتيكالىق قاراۋى; بارلىق قولجەتىمدى ليمفا تۇيىندەرىن جارىپ، ىشكى اعزالاردى ءتىلىپ تەكسەرۋ; قايناتۋ سىناماسى; فيننوزعا (تسيستيتسەركوز) زەرتتەۋ; جالپى رادياتسيالىق فوندى انىقتاۋ.
ۇشانىڭ ۆەتەريناريالىق تالاپتارعا سايكەستىگى انىقتالعان جاعدايدا، ەت ءارى قاراي بولشەكتەلىپ، وڭدەلەدى، ال قالدىقتار زالالسىزداندىرىلادى.
اقبوكەننەن الىنعان ءونىم ۆەتەريناريالىق دارىگەرلەر بەرگەن انىقتامامەن سۇيەمەلدەنەدى. بۇل قۇجات ءونىمنىڭ شىققان جەرىن، قاۋىپسىزدىگىن جانە ساپاسىن راستايدى.
وتكىزىلەتىن جانۋارلاردان الىناتىن ونىمدەر ۆەتەريناريالىق-سانيتاريالىق قاۋىپسىزدىك تالاپتارىنا ساي بولۋى قاجەت.
قازاقستان رەسپۋبليكاسىنىڭ «ۆەتەريناريا تۋرالى» زاڭىنىڭ 22-بابىنا سايكەس، جانۋارلاردان الىناتىن ونىمدەر مەن شيكىزاتتى ۆەتەريناريالىق-سانيتاريالىق ساراپتاماسىز وتكىزۋگە تىيىم سالىنادى.
سونىمەن قاتار، ىشكى ساۋدا نىساندارىندا ۆەتەريناريالىق ينسپەكتورلار كۇندەلىكتى باقىلاۋ جۇرگىزەدى. ولار: ۆەتەريناريالىق انىقتامانىڭ جانە سويۋ ورنىنىڭ تاڭباسىنىڭ بولۋىن; ءونىمدى تاسىمالداۋ كەزىندە تەمپەراتۋرالىق رەجيمنىڭ ساقتالۋىن; زەرتحانالىق باقىلاۋ ناتيجەلەرىن تەكسەرەدى.
وسىعان بايلانىستى، ۆەتەريناريالىق باقىلاۋ جانە قاداعالاۋ كوميتەتى تۇتىنۋشىلارعا اقبوكەن ەتىن ارنايى بەلگىلەنگەن ورىنداردان جانە ۆەتەريناريالىق ىلەسپە قۇجاتتار بولعان جاعدايدا عانا، تاماقتانۋ جانە ۆەتەريناريالىق-سانيتاريالىق قاۋىپسىزدىك تالاپتارىنا سايكەس ساتىپ الۋدى ۇسىنادى.
