ۇلتتىق بانك بازالىق مولشەرلەمەگە قاتىستى كەزەكتى شەشىم قابىلدادى. بازالىق ستاۆكا +/- 1 پ.ت. دالىزىمەن جىلدىق 16,5% دەڭگەيىندە بەلگىلەنىپ وتىر، دەپ حابارلايدى “ادىرنا”.
ۇلتتىق بانكتىڭ اقپاراتىنشا، جىلدىق ينفلياتسيا ماۋسىم ايىندا 11,8% بولعان. بارلىق كومپونەنت بويىنشا باعادا ءوسىم بايقالادى. تاريفتىك رەفورمالاردى ىسكە اسىرۋ اياسىندا رەتتەلەتىن قىزمەتتەردىڭ، سول سياقتى نارىق قىزمەتتەرىنىڭ قىمباتتاۋى ەسەبىنەن قىزمەت سەكتورى (16,1%) بۇرىنعىشا باعا وسىمىنە سەبەپ بولىپ وتىر. سونىمەن قاتار يمپورتتالاتىن تاۋارلار مەن اۋىل شارۋاشىلىعى ونىمدەرىنىڭ نەگىزگى تۇرلەرى قىمباتتاۋىنا بايلانىستى ازىق-تۇلىك ينفلياتسياسى (10,6%) دا ايتارلىقتاي ۇلەس قوسقان. ال ينفلياتسيانىڭ ايلىق ديناميكاسى 0,8%-عا دەيىن باياۋلادى.
«قازىرگى جاعدايدا ۇستامدى قاتاڭ اقشا-كرەديت ساياساتى ۇلتتىق بانكتىڭ قوسىمشا شارالارىمەن بىرگە ينفلياتسيانىڭ ءوسۋىن تەجەيدى. جەكە كرەديتتەۋ نارىعىن «سالقىنداتۋ» بويىنشا قابىلدانىپ جاتقان ميكرو جانە ماكروپرۋدەنتسيالىق شارالاردىڭ اسەرى بىرتىندەپ كۇشەيەدى دەپ كۇتىلۋدە. ينفلياتسيالىق فاكتورلاردىڭ قالىپتاسقان بالانسى، ونىڭ قازىرگى قارقىندى ديناميكاسى، پروينفلياتسيالىق ۇردىستەر مەن سىرتقى ورتاداعى بەلگىسىزدىك بازالىق مولشەرلەمەنى قازىرگىدەي دەڭگەيدە 2025 جىلدىڭ سوڭىنا دەيىن ساقتاۋ ىقتيمالدىعىنا ايتارلىقتاي سەبەپ بولىپ وتىر. اقشا-كرەديت ساياساتى كوميتەتى قاجەت بولعان جاعدايدا بازالىق مولشەرلەمەنى كوتەرۋ مۇمكىندىگىن دە جوققا شىعارمايدى»، - دەپ مالىمدەدى ۇلتتىق بانك.
بازالىق مولشەرلەمە بويىنشا كەزەكتى جوسپارلى شەشىم 2025 جىلعى 29 تامىزدا جاريالانادى.
ەستەرىڭىزگە سالايىق، 5 ماۋسىمدا ۇلتتىق بانك بازالىق مولشەرلەمەنى 16,5% دەڭگەيىندە قالدىرعان بولاتىن.
