شەرزات پولاتتىڭ ولىمىنە قاتىستى ۇكىم شىققاننان سوڭ مارقۇمنىڭ اكەسى العاش رەت اشىق مالىمدەمە جاسادى، دەپ حابارلايدى "ادىرنا" ۇلتتىق پورتالى.
جۋرناليست رۋسلان وتەپبايعا بەرگەن سۇحباتىندا قارجاۋباي نۇرىموۆ ايتبەك امانگەلدىمەن ارا-قاتىناسىنىڭ ءۇزىلۋ سەبەپتەرىن ءتۇسىندىردى.
«مەن ايتبەكتەن عانا باس تارتتىم، ادۆوكاتتاردان ەمەس. بىراق ايتبەك ادۆوكاتتارعا سىرتتان ەشكىمدى قوسپاۋعا بۇيرىق بەرىپ، مەنىڭ ۇسىنىسىم قابىلدانبادى.
باسىندا ايتبەكتىڭ قولداۋىنا سەنىپ ەدىم. الايدا ۋاقىت وتە كەلە سەنىمىم اقتالمادى. سوت پروتسەسىندە كوپتەگەن تۇسىنىسپەۋشىلىكتەر تۋىندادى. اقىرىندا مەن ادۆوكاتتاردان سەنىمحاتتى قايتارىپ الىپ، ءىستى مەيىرمان اعايعا تاپسىردىم»، – دەدى نۇرىموۆ.
ونىڭ ايتۋىنشا، ءىستىڭ «ادام ءولتىرۋ» ەمەس، «بۇزاقىلىق» بابىمەن قارالىپ جاتقانىن سوتقا 10 كۇن قالعاندا عانا بىلگەن. بۇل وزگەرىستى وعان ادۆوكاتى مەيىرمان شەكەەۆ حابارلاپتى.
ايتا كەتەيىك، باستاپقىدا كۇدىكتىلەرگە قر قك 99-بابى ("ادام ءولتىرۋ") بويىنشا ءىس قوزعالعان، كەيىننەن ول 293-باپقا ("بۇزاقىلىق") اۋىستىرىلعان.
