جەتىسۋ وبلىسىنىڭ پانفيلوۆ اۋدانىندا 15 جاستاعى قۇرالاي قيسابەكوۆانى ايۋاندىقپەن زورلاپ، ارتىنشا ءمايىتتى ورتەپ جىبەرگەن كۇدىكتىگە قاتىستى تىڭ دەرەكتەر شىقتى، دەپ جازادى "ادىرنا" ۇلتتىق پورتالى.
"ۆرەميا" باسىلىمىنىڭ حابارلاۋىنشا، جەتىسۋ وبلىسى شولاقاي اۋىلىنىڭ 15 جاسار وقۋشىسى شىلدەنىڭ 21-ءى كۇنى كەشكى ۋاقىتتا قۇربىسىنا كەتىپ، سول كۇيى ۇيىنە ورالماعان. پوليتسيا قىزمەتكەرلەرى ءىز-ءتۇزسىز جوعالعان قىزدى كەلەسى كۇنى ىزدەۋگە كىرىستى. ولارعا اۋىل تۇرعىندارى دا قوسىلىپ، سوڭعى ساتكە دەيىن قىزدىڭ امان-ەسەن تابىلاتىنىنا ۇمىتتەنگەن ەدى...
بىراق بۇعان دەيىن قىز زورلاعانى ءۇشىن ەكى رەت سوتتالعان 38 جاستاعى رۋستام احمەتوۆ ءوز كىناسىن مويىنداپ، قاماۋعا الىندى. كۇدىكتى دە شولاقاي اۋىلىنىڭ تۇرعىنى بولىپ شىقتى.
“5-6 جىل بۇرىن كامەلەتكە تولماعان قىزدى زورلادى، جازانى تولىق وتەمەي جاتىپ بوستاندىققا شىقتى. ودان كەيىن تاعى ءبىر قىزدى زورلاپ، جازادان قۇتىلۋ ءۇشىن وعان ۇيلەندى. ەندى بۇل وڭباعاننىڭ ارام قولى ءبىزدىڭ قىزىمىزعا دا جەتتى. ءبىز قىزىمىزدى ىزدەپ جۇرگەندە بۇل قانىشەر ەشتەڭە بولماعانداي جاركەنتتى ارالاپ، تاكسيلەتىپ ءجۇردى. ءبىز سوڭىنا دەيىن قىزىمىز ءتىرى دەپ ۇمىتتەندىك، بىراق ونى ءولى كۇيىندە تاپتىق”، – دەپ جىلايدى مارقۇم قىزدىڭ اپكەسى كامشات كوپباەۆا.
الماتى وبلىستىق پوليتسيا دەپارتامەنتى ءباسپاسوز قىزمەتىنىڭ حابارلاۋىنشا، كۇدىكتى مەكتەپ وقۋشىسىمەن جىنىستىق قاتىناسقا تۇسكەنىن، ودان كەيىن جاساعان ارەكەتىنەن قورىققاندىقتان ولتىرگەنىن مويىنداپ وتىر.
"كۇدىكتىنىڭ ايعاقتارىن تەكسەرۋ جانە ناقتىلاۋ كەزىندە جابىرلەنۋشىنىڭ ءمايىتى اۋىلداردىڭ ءبىرىنىڭ شەتىندەگى جەرلەنگەن جەرىنەن شىعارىلىپ، سوت-مەديتسينالىق ساراپتاماسىنا جىبەرىلدى. كۇدىكتى ۋاقىتشا ۇستاۋ يزولياتورىنا قامالدى، ءىس بويىنشا بىرقاتار قاجەتتى ساراپتامالار تاعايىندالدى", - دەلىنگەن حابارلامادا.
كۇدىكتىگە قاتىستى 3 قىلمىستىق ءىس قوزعالدى. ول كەم دەگەندە 17 جىل باس بوستاندىعىنان ايىرىلۋى مۇمكىن.
"ادىرنا" ۇلتتىق پورتالى
