800-دەن استام پويىز ۆاگوندارىنىڭ توزىعى جەتىپ، ابدەن ەسكىرگەن. بۇل تۋرالى Qazagstan ۇلتتىق تەلەارناسى مالىمدەدى.
ەلوردانىڭ ەسكى ۆوكزالى ارقىلى تاۋلىگىنە 36 پويىز وتەدى. عيماراتقا كۇنىنە 12 مىڭ جولاۋشى كەلىپ كەتەدى. جولاۋشىلار ءۇشىن قازىر ەكىنشى نە ءۇشىنشى جولعا توقتاعان پويىزعا جەتۋ مۇڭ بولىپ تۇر. سەبەبى ۆوكزالداعى 10 ەسكالاتوردىڭ ءبارى ىستەن شىققان.
جولاۋشىلار تۋنەل ارقىلى نەمەسە بيىك ساتىمەن جۇرۋگە ءماجبۇر. ونىڭ سىرتىندا ارباعا تاڭىلعان كەمباعال جاندار ءۇشىن ارنايى جول دا قاراسىتىرلماعان.
«ەسكالاتوردىڭ بولشەكتەرىن ۋاقىتىلى اكەلمەگەندىكتەن، ۋاقىتى وتكەن سايىن ءبىز امال جوق كەلىسىم-شارتتى بۇزۋعا مىندەتتىمىز. ال ول كومپانيالاردى سەنىمسىز كومپانيالاردىڭ تىزىمىنە ەنگىزۋ جۇمىستارى ءجۇرىپ جاتىر. شاعىمدار ءتۇسىپ جاتىر. بىراق ءبىز قولىمىزدان كەلگەنشە ءبىزدىڭ كەزەكشىلەرىمىز بار، تاكسيلەرىنە دەيىن جۇكتەرىن جەتكىزىپ كومەكتەسەمىز»، - دەدى نۇر-سۇلتان-1 تەمىرجول ۆوكزالىنىڭ باستىعى عالىم ءابدىحانوۆ.
قازاقستان تەمىر جولى ۇلتتىق كومپانياسىنىڭ وكىلدەرى بۇل ماۋسىمدىق ماسەلە دەيدى. حالىق جازدا ءجيى ساپارلايتىن بولعاندىقتان، تاپشىلىق تۋىندايدى.
«بيىل ەل ىشىندەگى دەمالىس ايماقتارىنا باراتىن حالىق سانى ارتىپ وتىر. سوندىقتان بيلەت جەتىسپەۋشىلىگى تۋىنداپ جاتىر. بىراق جولاۋشىلاردان ارىز-شاعىم تۇسسە، سوعان قاراپ ءبىز قوسىمشا ۆاگوندار تىركەپ جاتىرمىز. قازىر 158 باعىت بويىنشا پويىزدار قاتىناپ جاتىر»، - دەدى «جولاۋشىلار تاسىمالى» اق باس ديرەكتوردىڭ ماركەتينگ جانە ساتۋ جونىندەگى ورىنباسارىنىڭ مىندەتىن اتقارۋشى ەرلان جيمايلوۆ.
“ادىرنا” ۇلتتىق پورتالى
